“Qarabağ”ın yarımmüdafiəçisi Yassin Benziya “Fənərbağça”da oynadığı günləri xatırlayıb. Əlcəzair millisinin üzvü Ömər Əl-Abdellauinin “Qalatasaray”da başına gələnlərdən də danışıb.
Prosport.Az xəbər verir ki, 30 yaşlı oyunçu Türkiyədə başına gələnləri nəql edib: “Hər şey gözəl başlamışdı. Koku baş məşqçi idi, amma tezlklə qovuldu. Nəticələr pis olsa da, mən yaxşı oynayırdım. Prezdent Ali Koç 10 milyon avroluq transfer haqqını ödəyib məni “Lill”dən birdəfəlik almağı düşünürdü. Lakin nə baş verdisə, hər şey bir anda dəyişdi, mən lazımsız oldum”.
Benziya 2019-cu ilin əvvəlində olanlardan şoka düşüb: “Yanvarda təlim-məşq toplanışına getdik. Ərsun Yanal yaxşı oyunçu olduğumu, məni bəzən daha arxada oynadacağını deyirdi. Mən də qərarına hörmətlə yanaşacağımı söylədim. Davamında başverənlər isə ikiüzlülüyün son həddi idi. Yanvarın 31-də transfer dövrü bitdi, fevralın 1-də məşq matçında oynadılmayan tək adam mən oldum. Məşqçinin otağına getdim, niyə oynamadığımı soruşdum. Damien Komolli də orada idi. Yanalın cavabı məni şoka saldı: “Son gün sənin yerinə oyunçu aldıq və sənin adını iştirak ərizəsinə yazmadıq”. Zarafat etdiyini düşündüm, Komolli də xəbəri təsdiqləyəndə Yanala hücum etmək istədim. Daha sonra açıqlama vermək istəmədiyini deyib otaqdan çıxmağımı istədi”.
Yassin xəbəri menecerinə deyəndə o da inanmayıb: “Öncə Komolliyə, sonra isə müqavilə ilə məxsus olduğum “Lill”ə və Luis Kamposa zəng vurdu. Kampos “Fənərbağça” rəhbərliyinə zəng vurub FIFA-ya şikayət edəcəklərini bildirdi. 2 klub arasında böyük narazılıq yaşandı. Bu müddətdə itirən mən oldum. Oynamadığım üçün Afrika Millətlər Kubokunda millinin heyətində yer almadım. Əlcəzair həmin yarışın qalibi oldu, mənim sevincim isə yarımçıq alındı”.
Benzya maaşını almaqda çətinlik çəkirmiş: “Pulumu ala bilmirdim, hər gün təkbaşına məşq edirdim. Olayların baş vermə səbəbini bilməyənlər oynamadığım halda niyə maaş aldığımı soruşurdular. Türkiyədə maaşları 6-7 ay sonra ödəməyi sevirlər. Oynayanlar arasında da gec alanlar var idi. FIFA-ya şikayət etdim və pulumu 1 il gecikmə ilə də olsa, aldım”.
Futbolçu oxşar hadisələri sadalayıb: “Eynisi İslam Slimaniyə də edildi, “səni istəmirik” deyib oynatmadılar. Halbuki yanvarda vidalaşmaları mümkün idi. Yaxınlarda “Qarabağ”ın heyətində “Budö/Qlimt”lə oynadıq. “Olimpiakos”da komanda yoldaşım olmuş Ömər Elabdellaoui oradadır. Türkiyə xatirələrimizi bölüşdük. O, “Qalatasaray”da olarkən yaşadığı qəzadan sonra başına gələnləri danışdı. Müqaviləsi birtərəfli pozulmuşdu və klubdan göndərildiyini sosial şəbəkədən öyrəndiyini dedi. Orada belə şeylər çox olur”.
Xatırladaq ki, Lion “Olimpik”inin yetirməsi olan Yassin Benziya 2015-ci ildə “Lill”ə keçib. Fransa klubu onu 2018-də “Fənərbağça”ya 1 mövsümlük icarəyə verib. Yassin 6 ay oynadıqdan sonra mövsümün yarısını kənarda qalıb.