"Şamaxı" Misli Premyer Liqasının XVII turunda doğma meydanda "Səbail"lə 0:0 hesablı heç-heçə edib.

Prosport.Az xəbər verir ki, bölgə təmsilçisinin baş məşqçisi Ayxan Abbasov matçdan sonra keçirilən mətbuat konfransında jurnalistlərin suallarını cavablandırıb:

– Bilirdik ki, gərgin oyun olacaq. Hər iki komandaya xal lazım idi. Hava şəraiti oynamağa çətinlik yaradırdı. Belə meydançada oynamaq çox çətindir. 2 komandanı da təbrik edirəm. Ən əsası odur ki, bu gün zədələr olmadı. Bizim üçün önəmli 1 xaldır. Çox böyük itkilərimiz var. Qış fasiləsinə kimi mübarizə aparacağıq. Gənc futbolçular çox şans qazanır. Səbir etməliyik. Qışdan sonra tam başqa "Şamaxı" görəcəyik. Mən buna inanıram. Heyətimizi gücləndirəcəyik və sona qədər mübarizə aparacağıq. Hər kəsi səbirli olmağa çağırıram.

– Cavid Hüseynov bildirdi ki, meydançanı daha yaxşı vəziyyətə gətirmək olardı. Siz necə düşünürsünüz?
– Əvvəllər çempionatımız tez qurtarırıdı. İndi mövsüm həm tez başlayır, həm də gec bitir. Qəfil qar yağsa, çox yerdə belə vəziyyət olacaq. Bütün stadionlar qarlı havaya hazır olmalıdır. Qış aylarında oynayırıqsa, stadionlarda lazımi texnikalar olmalıdır.