"Artıq 14-cü dəfədir ki, ilin ən yaxşı məşqçisi adına layiq görülürəm. Hisslərimi sözlə ifadə etmək çox çətindir. Həqiqətən, mənim üçün çox xoş oldu. Hər dəfə ilin ən yaxşı məşqçisi seçiləndə məsuliyyət daha çox artır. Məni bu ada layiq görənlərə dərin təşəkkürümü bildirirəm. Təbii ki, mənə göstərilən etimadı doğrultmaq üçün hər zaman əlimdən gələni edirəm... Bu mükafatı 15-ci dəfə qazanmaq lazımdır. Düzünü desəm, mənim üçün də maraqlı oldu. 15 bəs edər? Bilmirəm. Daha çoxunu etmək barədə gələcəkdə düşünmək olar".
Prosport.Az xəbər verir ki, bunu bu gün keçirilən mükafatlandırma mərasimində "Qarabağ"ın və Azərbaycanda ilin ən yaxşı baş məşqçisi seçilən Qurban Qurbanov deyib.
Təcrübəli mütəxəssis "Qarabağ"ın avrokubok oyunlarından bəhs edib: "Hər bir uğurdan sonra məsuliyyətim daha da arttır, növbəti ilə daha istəkli başlamaq, uğurlu nəticə istəyirəm. Əfsuslar olsun ki, bəzən bizim düşündüyümüz kimi alınmır. Planlaşdırmadığımız epizodlarla üzləşirik. Vacib oyunlarda qırmızı vərəqələr, vacib oyunlardan öncə əsas oyunçuların zədəli olması... Mənim üçün məşq prosesi çox vacibdir. "Qarabağ"a sevginin azalmasını istəmirəm. Azarkeşlər bəzən bizdən daha çox şey gözləyirlər. Amma bəzən bəzi nüanslar buna mane olur. Fikirləşməyin ki, biz tənbəlləşmişik, uğurdan doymuşuq. Hər şeyi gözəl başa düşürük. Mən və klub üçün çətindir. Avropada "Qarabağ"a çox ciddi yanaşırlar. Bizim işimizlə çox maraqlanırlar ki, necə olub klub bu səviyyəyə çatıb. Əvvəl böyük klubların rəhbərliyi bir gün öncə vacib olduğu üçün bizimlə görüşürdülər, bu gün bizimlə hesablaşırlar. Bu klubun rəhbərliyini, işçilərimizi çox ciddi qarşılayırlar. Bakıda və ya səfərdə. Bütün rəqiblər çox ciddi hazırlaşırlar. Böyük klublara qarşı oynayırıq. Bəlkə məğlubiyyətlər bizə təcrübə verir. İş saatımızı daha da artırmaq lazım olduğunu bilirik. Futbolçulara deyirəm ki, sadə oynamalı, epizodlara daha ciddi yanaşmalıyıq. Məğlubiyyətlər bunu göstərdi. Bu il oyunlarımızı analiz edirik. Builki qədər qol epizodu yaratdığımız mövsümümüz olmayıb.
Avropada oyunlarımızdakı oyun dəqiqəsindən də bəhs edim. Son matçda oyun dəqiqəmiz 58-59 dəqiqə oldu. Amma ona qədər "Sabah"la oynadıq, 45 dəqiqə idi. "Sabah"la matçla "Elfsborq"la oyun arasında topun oyunda qalma müddətində 12 dəqiqə fərq oldu. Fərq çox böyükdür. Bəzən deyirik ki, oyunçu epizoddan istifadə edə bilmədi. Liqamızda oyunçu rahat olur. Avropada isə buna imkan vermirlər. Futbol çox inkişaf edib. O qədər xırda detallar var, analiz edirik. Geridəyik. Amma buna baxmayaraq, sizləri sevindirməyə çalışırıq. Azərbaycan futbolunu klub səviyyəsində ən azından bu səviyyədə saxlamağa çalışırıq. İşləyirik. Tək özümüzü yox, sizləri, azarkeşləri, xalqımızı düşünürük. Bu ilin sonuna yaxın nəticələrimiz zəif görünə bilər. Amma ili götürsək, 1/8 finala qədər yüksəldik. "Braqa"ya qarşı möhtəşəm oynadıq. Azarkeşlərimiz də Avropa futbolunun təcrübəsini yaşadı. Bu da təcrübədir.
İnanın ki, bunu sevə-sevə edirəm. Sənətimi sevirəm. Çalışırıq ki, inamınızı qoruyub-saxlayaq. Digər məşqçilərə təşəkkür edirəm. "Zirə"ni deyə bilərəm, çox gözəl təcrübə yaşadılar. Rəşad Sadıqov və digər məşqçilər... Digər klublarımızda oyun sayı daha çox oldu. Avrokuboklarda oyun sayı artıb, yaxşıdır. Gələcəyə həmişə pozitiv baxıram. Daha yaxşı nəticələr əldə etməyə çalışacağıq ki, uğurlarımız daha çox olsun".
Qeyd edək ki, Azərbaycanda 2024-cü ilin ən yaxşı futbol məşqçisi seçilən Qurban Qurbanov bu gün mükafatlandırılıb. O, komanda.az saytının 64 mətbuat orqanı arasında keçirdiyi səsverməyə əsasən 14-cü dəfə ilin məşqçisi adını qazanıb. O bu səsvermədə 47 səslə qalib olub. Rəşad Sadıqova ("Zirə) 8, Elmar Baxşıyevə ("Araz-Naxçıvan") 7 və Qurban Berdiyevə ("Turan Tovuz") 2 səs verilib. “Sumqayıt”ın keçmiş, “Neftçi”nin hazırkı çalışdırıcısı Samir Abasova isə səs verən olmayıb.