"Hakim Munis Abdullayevin (sabiq yan xətt hakimi – red.) oğlu idi. Oyunda şou açmışdı".

Bunu Prosport.Az-a "Qarabağ"ın 17 yaşadək komandasının (U-17) baş məşqçisi Rəşad Sadiqov deyib.

41 yaşlı məşqçi bu gün AFFA İntizam Komitəsi tərəfindən cəzalandırılıb. O, komandasının növbəti 5 oyununda texniki zonada ola bilməyəcək və onu köməkçisi Səbuhi Həsənov əvəzləyəcək. Cəzaya səbəb kimi isə onun 57-ci dəqiqədə baş hakim Emin Abdullayevi, o cümlədən federasiyanı təhqir etməsi və birbaşa qırmızı vərəqə alması göstərilib.

Rəşad Sadiqov məsələyə belə reaksiya verib: "Bəli, hakimi söymüşəm. Demişəm ki, bizə qarşı qayda pozuntusu olur, korsan, görmürsən? Doğrudan da bu epizodları görə bilməmək üçün ya kor olmalısan, ya da qərəzli olmalısan. Bu sözləri dediyim üçün 5 oyunluq cəzalandırıldım. Amma bu gün bilmişəm ki, protokolda bu sözdən əlavə, AFFA-nı da təhqir etdiyim yazıb. AFFA-nı niyə söyüm ki?! Burada onların günahı nədir?! Özünüz görüntülərə baxanda biləcəksiniz ki, mən nəyə görə hakim haqqında bu sözləri demişəm".

Qeyd edək ki, dekabrın 5-də "ASK Arena"da baş tutmuş görüş "Sabah"ın 2:1 hesablı qələbəsi ilə başa çatıb. Prinsipial tərəflərin I dövrənin ilk turunda "Sərhədçi" İdman Mərkəzinin stadionunda keçirilmiş matçında isə qalib müəyyənləşməmişdi – 1:1.

Sözügedən matçda məğlubiyyət "Qarabağ" üçün cari mövsümdə 2-ci yenilgi olub. Hazırda "Qarabağ" 38 xalla 2-cidir və lider "Zirə"dən cəmi 2 xal geridə qalır. "Sabah" isə 32 xalla 4-cüdür.

Səbuhi Musa