Dekabrın 6-da Argentinanın paytaxtı Buenos-Ayresdə Beynəlxalq Polo Federasiyasının (FIP) Baş Assambleyası keçirilib.

Prosport.Az xəbər verir ki, Assambleyada FIP üzvü olan ölkələrinin nümayəndələri ilə yanaşı, Beynəlxalq Çövkən Federasiyasının (ICF) baş katibi Matsey Olbrix xüsusi qonaq qismində iştirak edib.

ICF prezidenti Bəhruz Nəbiyev tədbirə virtual şəkildə qatılaraq qısa, lakin təsirli bir çıxış edib. O, çövkən və polonun oxşarlığını vurğulayaraq, bu 2 yaxın idman növünü dünyada tanıtmaq üçün birgə strategiyanın hazırlanmasının vacibliyini bildirib.

Tədbir çərçivəsində Olbrix FIP prezidenti Pyer Dilye və qurumun baş direktoru Alexandro Teylor ilə görüşərək, FIP və ICF arasında Dostluq Memorandumunun hazırlanması üzrə müzakirələr aparıb. Bu təşəbbüs hər iki təşkilat arasında artan əməkdaşlığın təzahürüdür.

Xüsusilə, çövkənin beynəlxalq səhnədə artan nüfuzunu vurğulayan Bakıdakı dünya çempionatının təşkil edilməsi ideyası böyük maraqla qarşılanıb.

Bu assambleya polo və çövkən icmaları arasında əlaqələrin möhkəmləndirilməsi, qarşılıqlı inkişafın təşviqi və hər iki idman növünün dünyada tanınması istiqamətində mühüm addım kimi qiymətləndirilir.