"Turan Tovuz" Misli Premyer Liqasının XVI turunda doğma meydanda "Şamaxı"nı 3:2 hesabı ilə məğlub edib.

Prosport.Az xəbər verir ki, qərb təmsilçisinin baş məşqçisi Qurban Berdiyev matçdan sonra keçirilən mətbuat konfransında jurnalistlərin suallarını cavablandırıb:

- İki fərqli hissə izlədik. İlk yarıda həvəssiz oyun nümayiş etdirdik. Amma ikinci hissədə tam əksi oldu. Futbolçular öz xarakterlərini göstərdilər. Onlara görə sevinirəm.

- Azarkeş olsanız, "Turan Tovuz"un oyunundan zövq alarsınız?

- İlk hissədən yox. Amma ümumilikdə yaxşı təsir bağışladığmız anlar olub.

- Araş Qaderini bundan sonra da hücumda oynatmaq fikriniz var?

- Araşı tanıdığıma görə onu meydana buraxdım. Stressli anlarda yaxşı oynamağı bacarır. Yavaş-yavaş əvvəlki formasını bərpa edir. Mən onu İrandan tanıyıram.

- "Şamaxı"nın ikinci qolundan əvvəl qayda pozuntusu gözlədiniz, sizin də sayılmayan qolunuz oldu. Bu epizodları necə şərh edərdiniz?

- Hamı səhv edə bilər. Məşqçilər də, oyunçular da, təbii ki, hakimlər də. Əsas odur ki, bilərəkdən olmasın. Allah hər şeyi görür.

- Deniz Marandiçdən sonra bu gün Xəyal Nəcəfov da zədələndi. Qarşıdakı matçlarda heyətlə bağlı problem yaşamayacaqsınız?

- Bu gün Fərid Yusifli özünü yaxşı tərəfdən göstərdi. Xəyalın da növbəti oyuna hazır olacağını gözləyirik. Zədəsi ciddi deyil.

- Qələbəni Denis Marandiçə həsr edirsiniz?

- Əlbəttə ki, onun yoxluğunu hiss etdik, Bu gün futbolçular Denisin formasını nümayiş etdirdilər. Uşaqlar onunla mütəmadi əlaqə saxlayır. Bu gün qələbəni Denisə həsr etdik.

- Qış hazırlığı ilə bağlı planınız nədir? Sizcə vaxt az deyil?

- Müddəti federasiya müəyyənləşdirir. Təbii ki, vaxt azdır. Futbolçular yaxşı istirahət etməlidir. Biz 4-13 yanvar tarixləri arasında Türkiyədə hazırlıq keçməyi düşünürük.

- Qələbədə azarkeşlərin payı nə qədərdir?

- Ən yaxşı azarkeşlər bizdədir. Səfərdə də bizimlə olurlar.