"Turan Tovuz" son vaxtlar qeyri-sabit çıxış edir. Premyer Liqanın XV turunda "Araz-Naxçvan"a 0:1 hesabıyla uduzan qərb klubu artıq ölkə kubokuyla da vidalaşıb.

Tovuzda "Sabah"a penaltilər seriyasında yenilməklə mübarizəni 1/4 final mərhələsində dayandıran komandanın artıq 1 yolu qalıb. Əgər çempionatda liderlər qrupundan qopsalar, avrokuboklara vəsiqə qazana bilməyəcəklər.

Gözlənildiyi kimi, mövcud vəziyyət klub rəhbərliyini qayğılandırır. Təəssüf ki, Qurban Berdiyevin reaksiyası adekvat deyil.

Prosport.Az sportinfo.az-a istinadən xəbər verir ki, baş məşqçi onlara hesabat verməkdən imtina edib. Rusiyalı çalışdırıcı uğursuz gedişatı vecinə almırmış kimi davranır. 72 yaşlı qoca Ehtiram Quliyevə və onun funksionerlərinə qətiyyən isti münasibət bəsləmir. Tərəflər gərginlik içindədir. Artıq bir neçə aydır ki, bu, belədir.

Berdiyev rəsmiləri yaxına buraxmır, komandanın durumuna dair fikir mübadiləsi aparmır. Adamlar rəsmən ondan qorxur.

Sabiq "Rostov"lu dəhlizdə görünəndə, hərəsi qaçıb bir küncdə gizlənir. Berdiyevin bir qıyqacı baxışı bəs eləyir ki, hamısı öz "pay"ını götürsün.

İdarə Heyətinin sədri hələlik "Baba" ilə açıq konfliktə girmir. İşçilərinə də baş məşqçi ilə ehtiyatla davranmağı, verdiyi hər tapşırığı vaxtında yerinə yetirmələrini tapşırıb.

Əlbəttə, bu da bir yerə kimidir. Hər şey nəticəyə bağlıdır. Komanda iddiasını itirdikcə, heç şübhəsiz, toqquşmalar qaçılmazdır. Ehtiram Quliyev hələlik səbrini basır.

Qitə arenasına vəsiqə şansı hazırda qalmaqdadır: Premyer Liqada 3-cü yerdə gedirlər.

Qarşıdakı həftələr bu mənada çox əhəmiyyətlidir. Qələbələr gəlməsə, qış fasiləsində baş məşqçi ayrılığı gündəmi "zəbt edəcək".

Onsuz da Berdiyev bəhanə axtarır ki, aradan çıxsın. İndiyədək 2-3 dəfə belə məqam arayıb və getmək istədiyini bildirib.