"Azərbaycanlı azarkeşlər də klubumuzu dəstəkləyir və burada məndən yaxşı nəticə gözləyirlər".

Prosport.Az xəbər verir ki, bunu Almaniyanın "Nürnberq" komandasında çıxış edən Azərbaycan millisinin futbolçusu Mahir Emreli klubun rəsmi televiziyasına müsahibəsində deyib.

27 yaşlı hücumçu II Bundesliqa təmsilçisinin sosial şəbəkə hesablarında azərbaycanlıların çoxluq təşkil etməsinə toxunub: "Burada pis şey görmürəm. Almaniyada ölkəmizi təmsil edirik. Buna görə hər attığımız addım önəmlidir. Həmişə ölkədən kənarda oynamaq, dünyaya bizim futbolçuları göstərmək, oyunçularımız üçün qapı açmaq arzum idi. Düşünürəm ki, ölkəmdəkilərin də mənə böyük ümidləri var. Onları məyus etməmək üçün əlimdən gələni etməyə çalışıram".

Forvard ötən turda "Fortuna" (Düsseldorf) komandası ilə matçdakı (2:2) nəticənin onları məyus etdiyini bildirib: "Ardıcıl 2 oyundur ki, son dəqiqələrdə qol buraxırıq. Bu səbəbdən özümüzü pis hiss edirik. Çünki rəqiblərdən daha yaxşı oynayırdıq. Növbəti görüşlərdə yaxşı nəticələr qazanacağımıza ümid edirəm".

Emreli XV turda sabah səfərdə üz-üzə gələcəkləri "Elversberq"lə oyun barədə danışıb: "Rəqibi təhlil edirik. Özümüzü növbəti qarşılaşmaya hazırlayacağıq. Bu matçda əlimizdən gələni edəcəyik. Gözəl stadionda oynamaq daha çox motivasiya verir. Həm də ən vacib olan fanatlardır. Tərəfdarlarımız hara getməyimizdən asılı olmayaraq, bizə dəstək olur, şou göstərirlər. Amma bəzən özümü səfərdəki kimi hiss etmirəm. Buna nümunə olaraq "Hoffenhaym"la (Almaniya Kuboku) matçı göstərə bilərəm. Özümü Nürnberqdəyik kimi hiss edirdim".

2-ci Bundesliqa təmsilçisində 4 qola imza atan oyunçu "ananız sizdən 5-ci qolu gözləyir" sualını da cavablandırıb: "Mən anamla həmişə bu barədə söhbət edirəm. Amma, deyəsən o indi bunu mənim dilimdən rəsmi olaraq eşitmək istəyir (gülür). Həmişə dediyim kimi, məni komandanın nəticəsi və 3 xal qazanması daha çox maraqlandırır. Düşünürəm ki, anam məndən bu qolu gözləyirsə, ümid edirəm ki, 5 və ya 6-cı qolu da “Elvsberq”lə matçda vura bilərəm. Bunu etməliyəm. Əks-halda evdə problem olacaq (gülür)”.

Mahir qol sevinci zamanı yunan komanda yoldaşı Stefanos Tsimasla birlikdə Kriştianu Ronaldunun hərəkətini təkrarlamalarına da münasibət bildirib: "Bilmirəm bu necə baş verdi. Ronaldu ən böyük oyunçulardan biridir. Amma mən onun fanatı deyiləm. Ola bilsin ki, Stefanos onun azarkeşidir. Biz belə sevindik. Azarkeşlər də bunu yaxşı qarşıladı və belə də sevinməyə davam etdik".

Daha sonra Mahir Emreli "Mahirovski" ləqəbi ilə darts oynayıb və 79 xal toplayıb. O bu nəticəyə nail olan 5-ci "Nürnberq"li futbolçu olub.