Qış fasiləsində “Qarabağ”dan ayrılacağı gözlənilən albaniyalı futbolçu Redon Cica ilə maraqlanan klublardan biri bəlli olub.

Prosport.Az xəbər verir ki, 26 yaşlı hücumçunun xidmətində Albaniyanın "Partizani" komandası maraqlıdır.

Yeni hücumçu axtarışında olan Tirana təmsilçisi təcrübəli oyunçunu heyətinə cəlb etməyi düşünür.

O daha əvvəl “Qarabağ”da az oyun şansı qazandığı üçün qışda komandanı tərk edə biləcəyini və bu səbəbdən Albaniya Superliqasına qayıdışının mümkün olacağını bildirmişdi.

Qeyd edək ki, Redon Cica Ağdam təmsilçisinə ötən ilin yanvarında Albaniyanın “Tirana” klubundan keçib. Onun Ağdam təmsilçisi ilə 2026-cı il iyunun 30-dək müddəti əhatə edən müqaviləsi var.