Beynəlxalq Ağırlıqqaldırma Federasiyası (IWF) Avropa üzrə Beynəlxalq Tədris Mərkəzinin (BTM) təşkil edilmə hüququna Azərbaycan namizəddir.

Prosport.Ax xəbər verir ki, bu barədə qərar IWF-nin Bəhreynin paytaxtı Manamada təşkil olunan İcraiyyə Komitəsinin iclasında qəbul edilib.

Tədbirdə bir çox məsələlərlə yanaşı, qurumun BTM-lərin hansı ölkələrdə qurulması da müzakirə edilib. Gündəliyə Avropa, Asiya, Afrika, Amerika və Okeaniya üzrə seçimlərin edilməsi salınıb.

İclasda Azərbaycan nümayəndə heyəti də iştirak edib. Azərbaycan Respublikasının Gənclər və idman nazirinin müavini Mariana Vasileva, Azərbaycan Ağırlıqqaldırma Federasiyasının prezidenti Kamran Nəbizadə və vitse-prezidenti Firdovsi Umudovun da qatıldığı iclasda Azərbaycanın namizədlik təqdimatı edilib. Öncə Kamran Nəbizadə çıxış edərək dəvət və federasiyamıza bu layihədə iştirak imkanı üçün beynəlxalq quruma təşəkkür edib və göstəriləcək etimadı doğruldacaqlarına əmin olduğunu qeyd edib.

Daha sonra Azərbaycanın təqdimatı edilib. Məsələnin rəsmiləşməsi barədə qərar sabah qəbul ediləcək.

Dünyada cəmi 5 belə mərkəz qurulacaq. Azərbaycanla yanaşı, belə namizədlik Asiyada Çinə, Afrikada Misirə, Amerikada Kubaya, Okeaniyada isə Avstraliya ilə Samoaya verilib.

Qeyd edək ki, BTM-də ağırlıqqaldırma üzrə beynəlxalq məşqçilik kursları, lisenziyalaşdırma üzrə seminar və mühazirələr, həmçinin müvafiq hakimlik məşğələləri, digər texniki rəsmilər, həmçinin idmançılar üçün dərslər, kateqoriya və ixtisas təlimləri keçiləcək. Mərkəzdəki tədrisdə Avropa və ehtiyac olacağı təqdirdə, yaxın region ölkələrinin nümayəndələrinin iştirakı təmin ediləcək. Azərbaycanda BTM Bakıdakı "ASK Arena"da yerləşəcək.