"Turan Tovuz" ayağı sınan moldovalı sol cinah müdafiəçisi Denis Marandiçin durumu ilə bağlı məlumat yayıb.

Prosport.Az xəbər verir ki, legioner futbolçu Gəncə xəstəxanasına aparılıb və Bakıda əməliyyat olunacaq:

"Turan Tovuz" – "Sabah" oyununda ağır zədə alaraq oyunu tərk edən futbolçumuz Denis Marandiç dərhal Mərkəzi Klinika Gəncə Xəstəxanasına çatdırılıb. Fibula sümüyünün tam yerini dəyişmiş sınığı və tibia sümüyünün yerdəyişməmiş sınığı aşkarlanan futbolçunun ayağı gipsə qoyulub.

Klub həkiminin və xəstəxananın rəyinə əsasən futbolçunun Bakı şəhərində əməliyyat olunması nəzərdə tutulub. Qeyd edək ki, əməliyyatın vaxtı ayağa toplanan hematomanın sovrulmasından sonra mümkün olacaq. Ehtiyac duyularsa, futbolçunun əməliyyatı ölkə xaricində həyata keçiriləcək"