"Sabah"ın 19 yaşadək futbolçulardan ibarət komandası UEFA Gənclər Liqasının II təsnifat mərhələsində mübarizəni dayandırıb.

Prosport.Az xəbər verir ki, Bayıldakı "ASCO Arena"da İsveçrə təmsilçisi "Bazel"lə qarşılaşan Adino Mustedanaqiçin baş məşqçisi olduğu kollektiv 1:2 hesabı ilə məğlub olub.

Azərbaycan klubunun yeganə qoluna 89-cu dəqiqədə Anar Hüseynov imza atıb. Qonaqlardan Elia Cordan (37) və Aqon Recay (85) fərqlənib.

Qeyd edək ki, ilk matçda "Bazel" 6:0 hesablı qələbə qazanmaqla cavab oyununu formallığa çevirmişdi.

"Sabah"ın xorvatiyalı baş məşqçisi Adino Mustedanaqiç oyunla bağlı bu fikirləri səsləndirib: "Məğlub olsaq da, ilk oyundan sonra komandada olan irəliləyişdən razı qaldım. Cütün taleyi ilk oyunda həll olunmuşdu, buna baxmayaraq, "Bazel" bu matça ən yaxşı "11"liklə çıxmışdı. Yüksək rəqabətli oyunun şahidi olduq. Bu matçda da "Bazel" fərqlənmək üçün nə qədər az fürsətə ehtiyacı olduğunu göstərdi. Oyunda qapıya zərbələr bərabər idi, bəzi anlarda topu özümüzdə saxlamağı bacardıq. Məqsədimiz o idi ki, futbolçularımızın hər biri ilk oyundakından daha yaxşı olsun. Fikrimcə, hər bir oyunçumuz bunu bacardı. Bundan əlavə, bəlkə də növbəti mövsümdə də UEFA Gənclər Liqasında oynaya biləcək futbolçulara şans verərək, onların müəyyən təcrübə toplamalarına şərait yaratdıq. Həmin oyunçulardan biri də bu oyunda qol vurmağı bacardı. Fikrimcə, bu matçlardan çox dərs aldıq və indi oyunçularımızı daha da inkişaf etdirmək üçün yaxşı təcrübəmiz var.

"Bazel"i növbəti mərhələyə adlaması münasibəti ilə təbrik edirəm. Fikrimcə, bu komandanın UEFA Gənclər Liqasında irəliləmək imkanları yetərincə yüksəkdir".