Podqoritsada təlim-məşq toplanışında olan 18 yaşadək futbolçulardan ibarət Azərbaycan millisi yoxlama görüşündə Monteneqroya qalib gəlib.

Prosport.Az xəbər verir ki, Monteneqronun Tuzi şəhərinin "Deçiç" klubuna məxsus stadionda keçirilən qarşılaşmada U-18 rəqibini 2:1 hesabı ilə məğlub edib.

Miloş Beşoviçin idarə etdiyi oyunda millinin heyətində 5-ci dəqiqədə Emin Feyzullayev, 56-cı dəqiqədə isə Rəşad Alışov fərqlənib. 36-cı dəqiqədə isə meydan sahiblərindən ABŞ-nin "Çikaqo Məcik" klubunun hücumçusu Boqiç Miloşeviç qol vurub.

Monteneqro: Uroş İlinçiç, Maksim Cukiç (Zariya Mugoşa, 46), Voyislav Yokiç, Andrey Bojoviç, Petar Yaukoviç, Luka Brayoviç (Luka Peroviç, 55), Luka Şekiç (Draqutin Şaranoviç, 46), Todor Milyaniç, Mladen Raçiç (Lazar Martinoviç, 46), Boqiç Miloşeviç (Matiya Nikçeviç, 64), Nemanya Vlaxoviç (Yaqoş Roqanoviç, 46)
Baş məşqçi: Qoran Perişiç

Azərbaycan: Həbib Hüşənov, Ömər Əliaslanlı, Nadir Orucov, Əkbər Məhərrəmov, Emin Feyzullayev, Ömər Kərimov (Cavid Məlikov, 90+5), Babamirzə Mehdiyev (Əli Qurbanov, 90+1), Röyal Fərzullazadə (Rauf Qafarov, 37 / Arzu Mədətov, 71), Ziya Şəkərxanov (Əmir Əliyev, 46), Murad Mustafayev, Rəşad Alışov
Baş məşqçi: Füzuli Məmmədov

Qeyd edək ki, komandalar arasında oktyabrın 29-da keçirilən ilk oyunda Monteneqro yığması 2:0 hesablı qələbə qazanıb. Həmin matç paytaxt Podqoritsada "Titoqrad" klubuna məxsus stadionda baş tutmuşdu.