Saytımızda xəbər çıxdıqdan az sonra Zahid Əliyev bizimlə əlaqə saxlayıb.
Prosport.Az-a açıqlamasında məşqçi bildirib ki, artıq məsələ yoluna qoyulub:
"Anar Məmmədov hələ dövlətdən pulu almadığını, aldıqdan sonra söz verdiyi kimi yarısını mənə verəcəyini bildirdi".
12:24
Boks üzrə Əməkdar məşqçi Zahid Əliyev sabiq yetirməsi Anar Məmmədovdan şikayətlənib.
Prosport.Az-ın məlumatına görə, olimpiya, dünya və Avropa mükafatçısı Kamran Şahsuvarlı və dünya çempionu Cavid Çələbiyevin müəllimi olan məşqçi kubalı legionerimiz Loren Alfonsonu Paris Olimpiadasına şəxsən özünün hazırladığını bildirib.
Bununla belə, şəxsi məşqçi kimi Anar Məmmədovun adı təqdim olunub. Zahid Əliyev isə Olimpiadadan sonra A.Məmmədovun söz verdiyi puldan ona heç nə verilmədiyini vurğulayıb: "Anar heç bir dəfə də zala məşqçi kimi girməyib. 2 dəfə dövlət ordeni ilə təltif olunub, 2 dəfə mənzil verilib və xeyli miqdarda pul götürüb. Yeganə tələbəmdir ki, mənə heç nə verməyib. Fikirləşirdim ki, biz ata-oğul kimiyik. O bildirmişdi ki, Alfonsonu Olimpiadaya hazırlaşdırın, onun (uğuru) üçün veriləcək pulu qardaş kimi böləcəyik. İndi isə o bu pulu verməkdən imtina edib. Deyir ki, mən sənə hörmət edə bilərəm. Yeganə adamdır ki, məşqçilik nədir bilmədiyi halda, 2 dəfə dövlətdən medal alıb. Bir dəfə olsun gəlib deməyib ki, müəllim, sağ ol. Belə çörək itirən, şərəfsiz tələbələrim də olub".
Onu da bildirək ki, ölkə başçısı İlham Əliyevin Sərəncamına görə, 2-ci yeri tutan idmançının məşqçisinə 100 min manat ödənilib. Həmçinin, onun Milli Olimpiya Komitəsinin prezidenti kimi imzaladığı Sərəncama əsasən, həmin məşqçiyə 50 min də əlavə ödəniş olub. Loren Alfonso finalda uduzduğundan, ümumilikdə 150 min manat Anar Məmmədova təqdim edilib. Lakin Zahid Əliyev ona bu puldan heç nə çatmadığını iddia edir.
Qeyd edək ki, boks üzrə Əməkdar məşqçi və beynəlxalq dərəcəli idman ustası olan Anar Məmmədov 2022-ci ildə "Tərəqqi" medalı ilə də mükafatlandırılıb. Ona medalı şəxsən gənclər və idman naziri Fərid Qayıbov təqdim edib.
Boks üzrə milli komandanın sabiq rəisi işləyən vaxt Anar Məmmədovun kubalı legionerləri komandaya gətirdiyi iddia olunurdu. Məmmədovun kikboksinq idman növündə nailiyyətləri olsa da, boksda heç bir uğurunun olmaması da onun təyinatının birmənalı qarşılanmamasına gətirib çıxarmışdı.
