Xorvatiyanın Mali Loşin şəhərində bu gün start götürən minifutbol üzrə 23 yaşadək kişi və qadınların dünya çempionatında qeyri-adi hal yaşanıb.

Prosport.Az-ın xəbərinə görə, Afrika komandaları yarışa qatıla bilməyib.

Belə ki, Mavritaniya Xorvatiyaya viza ala bilməyib. Misir isə ölkəsinin Gənclər və İdman Nazirliyi ilə problem yaşadığından, yarışa qatılmaqdan imtina edib.

Bundan başqa, İraq da viza ala bilməyib. Ən gülməlisi odur ki, meydan sahibi Xorvatiya da yarışda iştirakdan imtina edib. Bunun səbəbi açıqlanmasa da, Xorvatiyanın U-23 üçün heyət yığa bilməməsini güman etmək olar. Çünki Xorvatiya Minifutbol Assosiasiyası hələ avqustun 26-da U-23-də oynamaq üçün CV göndərilməsi üçün elan yerləşdirmişdi. Görünür, heyət tam komplektləşdirilməyib və rəhbərlik evdə rəqiblərə böyük hesabla məğlubiyyəti nəzərə alaraq həvəskar statuslu yarışdan imtina etməyin ən düzgün qərar olduğunu düşünüb.

Yaponiyanı isə Avstriya əvəzləyib. İştirakçı komandalar isə bu imtinaları yalnız püşkatma zamanı öyrənib. Məhz bu səbəblərdən 3 yox, 2 qrupun püşkü atılıb.

Qeyd edək ki, qadınların yarışında A qrupunda ABŞ (son dünya çempionu), Kosta Rika, Çexiya, B qrupunda Ukrayna, Rumıniya, Meksika və Slovakiya yarışacaq. Kişilərin yarışında isə A qrupunda Kolumbiya (son dünya çempionu), Slovakiya, İngiltərə, Avstriya, B qrupunda Çexiya, Azərbaycan, Serbiya və Hindistan mübarizə aparacaq.

Futzal millimizin sabiq oyunçusu Rəcəb Fərəczadənin çalışdırdığı millimiz bu gün Bakı vaxtı ilə saat 15:30-da Serbiya ilə ilk matçına çıxacaq. Sabah U-23 yığmamız Hindistanla (18:45) və oktyabrın 9-da Çexiya (14:00) ilə qarşılaşacaq.