AFFA-nın bayrağı altında təşkil edilən U-16 liqasında VII turun, U-17 Liqasında isə VI turun oyunları keçirilib.

Prosport.Az-ın xəbərinə görə, "Qarabağ"ın müvafiq komandaları yenə parlaq qələbələr qazanıb.

Heyətinin əsas hissəsi U-15 millisi ilə Minskdə və U-16 ilə Ərzurumda olsa da, Asif Əlizadənin baş məşqçisi olduğu komanda UFA-nı (Universal Football Academy) darmadağın edib – 7:1. Qolları "Qarabağ"dan Adəm Qafarov (5), Riad Qaradağlı (25, 32, 47, 75, 80 (pen.), Fərid Cavadlı (51), UFA-dan Yusif İsmayılzadə (58) vurub.

4 oyunda maksimum xal qazanan "Qarabağ" 2 pillə irəliləyib və 12 xalla 3-cü yerə yüksəlib. "Qarabağ"ın "Kəpəz"lə Gəncədə keçirilməli olan VIII turun qarşılaşması isə milli komandada futbolçuların olması səbəbindən təxirə salınıb. Ağdam təmsilçisini növbəti oyununu oktyabrın 9-da IV turdan təxirə salınmış matçda 10 xalla 8-ci pillədə olan EFA-ya (European Football Academy) qarşı keçirəcək.

Rəşad Sadiqovun baş məşqçisi olduğu U-17 komandası isə "Sumqayıt"ı 4:2 məğlub edib. "Qarabağ"dan Abdulaziz Cabbarlı (35), Əli İbrahim (41), Əli Əliyev (47), Əhməd Vəliyev (67), "Sumqayıt"dan isə Emil Həsənov (39, 82) fərqlənib.

Çempionatda məğlubedilməz 2 komandadan 1-i olan "Qarabağ" yenə 4-cüdür. Komanda 13 xala malikdir. "Köhlən atlar" VII tur çərçivəsində bu gün Şağan Olimpiya İdman Kompleksinin stadionunda lider "Zirə"nin qonağıdır.