UEFA Çempionlar Liqasının ilkin mərhələsində mübarizə aparacaq “Araz-Naxçıvan” futzal klubu avqustun 21-də “Sparta” (Şimali İrlandiya), ertəsi gün Estoniya çempionu “Sillamae Silla”, avqustun 24-də isə İsveçin “Uddevalla” klubu ilə qarşılaşacaq.
Prosport.Az bununla bağlı komandanın baş məşqçisi Vitali Borisovun müsahibəsini təqdim edir:
– Bir neçə gündən sonra Çempionlar Liqasında mübarizəyə start verəcəksiniz. Komandada vəziyyət necədir?
– Vəziyyət normaldır. Bakıdakı hazırlığımızı bugünkü məşqlə yekunlaşdırdıq. Komanda üzvləri sabah istirahət edəcək, avqstun 20-nə keçən gecə yola düşəcəyik. Yaxşı təlim-məşq toplanışı keçirdik. Həm fiziki yükləmələr oldu, həm də taktiki çalışmalar yerinə yetirdik. Problem 3 zədəli futzalçımızın olması ilə bağlıdır. Ümid edirik ki, oyunlara qədər onlar tam sağalacaq.
– Yoxlama oyunu hansı çatışmazlıqları və ya müsbət məqamları ortaya çıxardı?
– Maraqlı oyun oldu. Xüsusilə də ilk hissədən çox razı qaldım. Açığı, ilk oyunda komandamın bu cür sürət verəcəyini gözləmirdim. Hələ 3-4 oyunçumuz meydana çıxmamışdı.
– Komandanı demək olar ki, yenidən qurdunuz. Yeni transferlər uyğunlaşa biliblərmi?
– Demək olar ki, uyğunlaşıblar. Hələ bir neçə gün vaxtımız var. Çalışmalar davam edir. Hər kəs məsuliyyətlə işini icra edir. Komandanın qarşısına konkret tapşırıq qoyulub: əsas mərhələyə yüksəlməliyik. Bunun üçün də rəhbərlik nə lazımdırsa, edib. Qalır tapşırığı yerinə yetirmək.
– Heyət tam komplektləşib, yoxsa yenə transferlərə ehtiyac var idi?
– İlkin mərhələ üçün lazım olan futzalçıları heyətimizə qatmışıq. Hər biri ilə söhbətimiz olub. Onlar komandamıza çox kömək edəcək.
– Komandanın qarşısına əsas mərhələyə yüksəlmək tapşırığı qoyulub. Tapşırığı yerinə yetirmək mümkün olacaq?
– Meydan düz, top yumrudur. Əlbəttə, ora qarşıya qoyulan məqsədə çatmaq üçün gedirik. Əlimizdən gələni edəcəyik ki, buna nail olaq. Futzalçılar da komandaya nə üçün dəvət olunduqlarını bilir. Bakıya qrup lideri kimi qayıtmaq üçün səfərbər olmuşuq.
– Rəqiblərlə bağlı hansı məlumatlar toplamısınız?
– Müəyyən kəşfiyyat aparmışıq (gülür). Əlbəttə, biz onları, onlar da bizi araşdırır. Müəyyən informasiya toplamışıq, təhlillər aparmışıq. Meydanda da hər birinə qarşı necə oynayacağımızın konturlarını cızmışıq.