Azərbaycan Basketbol Liqasının debütantı "Sabah"ın çempion olmasında kapitan Fuad Niftəliyevin də böyük rolu olub. Prosport.Az təcrübəli basketbolçudan müsahibə götürüb.

– Səmimi cavab almaq istəyirəm. Mövsümə başlayanda çempion olacağınızı gözləyirdiniz?
– Bəli. Daha əvvəl müsahibəmdə də demişdim ki, biz ancaq çempionluğa oynayırıq. Demişdim ki, ən pis halda ilk "3-lük"də olacağıq.

– "Gəncə" komandası ilə çempionluğun taleyinin 5-ci matçda həll olunacağı necə, bu, gözlənilməz olmadı?
– Sözün düzü, mən də bu yerə kimi uzanacağını gözləmirdim. Çünki onlarda bizdən fərqli olaraq, ehtiyat oyunçular skamyası çox zəngin deyil. Fikirləşirdim ki, 4-cü matçda – ümumi hesabda 3:1 qalib gələrək çempion olacağıq. Amma bundan öncəki oyunda meydana çox rahat çıxdıq. Bu səbəbdən oyunumuz alınmadı, uduzduq və məsələ 5-ci matça qaldı.

– Yəni, 4-cü oyunda arxayınlaşma oldu?
– Bəli, bəli. Amma bu gün özümüzü topladıq. Oyun əvvəl istədiyimiz kimi gedirdi. Amma "Gəncə" komandası da mübarizə apardı və xalda bizə çatdı. Əsl final oyunu oldu.

– Oyunu overtayma aparan atış barədə nə deyə bilərsiniz?
– Eycey (Entoni Patinin ləqəbidir – S.M.) əslində bir dəfə də belə atışla bizi məğlubiyyətdən xilas edib. Bu, ikinci belə hal oldu. Necə deyərlər, güclü qalib gəldi.

– Onda belə desək, müəyyən mənada ona borclusuz...
– Borclu deyəndə ki, çox atışı ona həvalə edirik. Çünki onun atışları yaxşı olur. Kombinasiyanı elə qururuq ki, Eycey topu basketə atsın. Deyərdim ki, "Gəncə" ilə ilk 2 oyunda atışları o qədər də yaxşı alınmadı. Amma 4-cü və 5-ci matçlarda gözəl oyun nümayiş etdirdi.

– Artıq çempionsunuz. Avrokuboklarda çıxışınız nə dərəcədə realdır?
– Basketbol Federasiyasının prezidenti Emin Əmrullayev bizi təbrik edəndə bildirdi ki, inşallah, avrokubokda Azərbaycanı təmsil edərsiniz. Yəqin ki, avrokuboklar üçün tələb olunan meyarlara cavab vermək üçün klubumuz da bunun üzərində işləyəcək. Avrokuboklarda çıxış etməyi çox istərdik.

Səbuhi Musa