Dünən "Azersun Holding"ə məxsus olan "Dreamland Golf Villas & Residences"də "Qarabağ"ın 10-cu çempionluğu münasibətilə xüsusi ziyafət təşkil olunub.

Prosport.Az-ın xəbərinə görə, həmin tədbirdə klub rəhbərliyi, işçiləri və komandadan başqa, Suraxanı Rayon İcra Hakimiyyətinin başçısı Əziz Əzizov, gənclər və idman naziri Fərid Qayıbov, AFFA-nın baş katibi Sərxan Hacıyev, PFL prezidenti Elxan Səmədov və media qonaq qismində iştirak edib.

İlk öncə çıxışlar olub. Çıxışlardan sonra "Qarabağ"ın braziliyalı dayaq yarımmüdafiəçisi Juliu Romau samba rəqsi ilə hamının alqışlarını qazanıb. Həmçinin, futbolçu Qara Qarayev "Qarabağ" mahnısını ifa edib.

Daha sonra Qara Qarayev, Elvin Cəfərquliyev, yaxınlarda millimizdəki karyerasını başa vuran braziliyalı Rişard Almeyda və eləcə də Adil Nadirovun prezidentliyi dönəmində "Qarabağ"ın çətin vaxtlarında oynamış Məhərrəm Hüseynov musiqili əyləncəli viktorinada iştirak edib. M.Hüseynov qalib gəlib.

Sonda üzərində böyük 10 rəqəmi yazılmış tort kəsilib. Həmin anın görüntülərini Prosport.TV-nin kamerası ilə təqdim edirik: