"Turan Tovuz"un baş sponsoru olan "Huner Group"un təsisçisi və direktoru olan Ehtiram Quliyev şirkətlərə səslənib.

Prosport.Az xəbər verir ki, həmin çağırışın mətnini ixtisarla təqdim edirik:

"Dəyərli iş adamları və “Turan”daşlar!

Məlumunuzdur ki, bu ilin fevral ayında biz “Huner Group” olaraq ölkə idmanı və xüsusilə region futbolunun inkişafı üçün "Turan Tovuz" PFK ilə baş sponsorluq müqaviləsi imzaladıq. Əsas məqsədimiz ölkənin ilk müstəqil futbol klubunun inkişafında öz dəstəyimizi göstərmək idi. Bu, uzun müddətdən sonra Premyer Liqaya vəsiqə qazanmış klub üçün çox önəmli idi. 2022/2023 futbol mövsümü başa çatmaq üzrədir. Artıq “Turan Tovuz” PFK-nın Premyer Liqada qalması dəqiqləşib. Önümüzdəki mövsüm daha güclü klub görmək istəyiriksə, bu işdə bir olmalıyıq!

Əziz dostlar, sizi “Turan”ımıza dəstək olmağa çağırıram!

Klubun inkişafı üçün “Turan” bir neçə sponsorluq təklifi hazırlayıb. Stadionun adı, akademiyanın adı, futbol formasında yazı və s. kimi müxtəlif sponsorluq anlaşmalarından birinə qoşulmaqla siz həm “Turan Tovuz” PFK-nin inkişafına dəstək vermiş olacaqsınız, həm də yeni, böyük miqyaslı platformada reklam olunmaq şansı əldə edəcəksiniz. Vaxtilə Avropa Liqasında oynamış klubumuzun şöhrətini geri qaytarmaq üçün bir olaq, birlikdə “Turan”ımızın bayrağını yüksəklərə qaldıraq!"