AFFA-nın təşkil etdiyi həvəskar statuslu Region Liqasında 2022/23 mövsümü sona yaxınlaşır. 21 mayda "ASK Arena"da (keçmiş "Şəfa") "Qusar" – "Arpaçay" ("Şərur") və Bayıldakı "ASCO Arena"da "Marxal" (Şəki) – "Çinar" (Zəngilan) yarımfinal oyunları keçiriləcək. Hər 2 matç saat 16:30-da start götürəcək.
Prosport.Az bu məqsədlə "Qusar" komandasının təsisçisi, Azərbaycanın ilk FIFA lisenziyalı meneceri, "Standard", "Olimpik" kimi klubların təsisçisi, hazırda minifutbol üzrə Azərbaycan çempionatında çıxış edən "Beerbasha" komandasının təsisçisi və kapitanı Kamil Məmmədovdan müsahibə götürüb.
– AFFA-nın təşkil etdiyi Region Liqasında çıxış edən "Qusar" komandasının siz tərəfindən yaradılması necə oldu?
– Mən Qusarda böyümüşəm. Bir qusarlı olaraq bizim rayonda həmişə böyük futbolun olmasını arzulamışam. "Şahdağ"ın I diviziondan uzaqlaşdırılmasından sonra Qusarda peşəkar futbol yox idi. Qərara gəldik ki, futbolsuz qalan qusarlı oyunçulardan ibarət komanda quraq və Qusar əhalisini sevindirək. Artıq 3-cü ildir ki, bu komanda ilə iş görürük. Ötən il olduğu kimi, yenə Region Liqasında yarımfinal mərhələsinə kimi gəlmişik. Bizim məqsədimiz Qusarda və şimal zonasında futbolun səviyyəsini qaldırmaq, eləcə də I divizionda – peşəkar çempionatda çıxış etmək olub. Region Liqası bölgələrdə futbolun inkişafı baxımından əla layihədir. Ancaq inanıram ki, gələcəldə bu layihənin qaliblərinin I diviziona yüksəlməsi ilə bağlı bağlantı da olacaq.
– Komandanın bütün xərcləri siz tərəfindən çəkilir, ya başqa şəxslər tərəfindən də kömək olunur?
– Kömək edən yaxın dostlar var. Amma demək olar ki, əsas xərcləri özüm çəkirəm. Bildiyiniz kimi, Region Liqasında xərclər çox tələb olunmur.
– Niyə Region Liqası oyunlarınızı yarımfinaladək Qusarda yox, Siyəzəndə keçirdiniz?
– Çünki bir neçə ildir ki, Qusarın Şövkət Orduxanov adına şəhər stadionu bərbad vəziyyətdədir. Orda inşaat işləri gah başlayır, gah da dayanır deyə oranın durumu bilinmir. Ona görə də məcburiyyətdən Siyəzəndə oynamışıq. Amma AFFA-nın reqlamentinə əsasən yarımfinal və final oyunları neytral meydanda keçirilir.
– Bu matça Qusardan da azarkeşlərin gəlişi nəzərdə tutulub?
– Hazırda bu məsələ üzərində iş gedir. Qusardan Bakıya azarkeşlərin gətirilməsi üçün avtobusların təşkilinə çalışırıq. Stadionda çox tamaşaçının olacağı gözlənilir. Qusar camaatı həqiqətən futbol üçün darıxıb.
– Region Liqasının qalibi olsanız, I diviziona iştirakla bağlı müraciət etməyi düşünürsünüz?
– Düşünürəm ki, artıq divizionda iştirak etməyimiz üçün heç bir maneə yoxdur və müraciətimizi də etmişik. I divizionda iştirak etmək üçün Region Liqasında 3 il iştirak etmək qaydası artıq ləğv olunub. Düşünürəm ki, bu qaydanın ləğv olunması doğrudur. Qusarda tamaşaçı baxımından da problem yoxdur. Hər zaman oyunlarımızda çoxlu sayda azarkeşə rast gəlmək mümkündür. Biz görürük ki, artıq AFFA idman prinsiplərinə əməl olunması üçün işlər görür, diviziondan Premyer Liqaya komanda çıxır. Bu da bizdə motivasiya formalaşdırdı və I divizionda iştirakla bağlı AFFA-ya müraciət etdik. Əgər Şövkət Orduxanov adına şəhər stadionunda ev oyunlarımızı keçirmək mümkün olmasa, ehtiyat variant kimi də stadion tapmışıq. Hazırda o yerin məxsus olduğu qurumla danışıq aparırıq. I divizionda iştirak etmək üçün aşağı yaş qrupu komandalarımız da olacaq. Bunun üçün Qusar və ətraf rayonlarında yerləşən futbol məktəbləri ilə danışıqlar aparmışıq.
– I divizionda iştirak üçün AFFA-nın baş sponsoru olan SOCAR tərəfindən hər kluba 300 min pul ayrılacaq. İştirakınıza "yaşıl işıq" yandırılsa, bu məbləğlə kifayətlənəcəksiniz?
– Xeyr, bu məbləğlə kifayətlənmək fikrimiz yoxdur. Bölgənin peşəkar futbola qayıdışının rəsmiləşməsindən sonra Qusar iş adamlarından gözləntilərimiz böyükdür.
Səbuhi Musa
