I Liqanın Yevlaxda keçirilən "Karvan" – "Mingəçevir" oyunu qalmaqalla yadda qaldı.
"Karvan"ın kapitanı, vaxtı ilə 19 yaşadək millimizdə, eləcə də "Qəbələ", AZAL, MOİK, "Kəpəz" kimi klublarda çıxış etmiş Müşfiq Teymurov qonaq azarkeşlərə qarşı ədəbsiz jesti ilə yadda qaldı. Əvvəlcə qol vurduğu epizodda mingəçevirli azarkeşlərə tərəf qaçaraq sevincini onların qarşısında qeyd etməklə odun üstünə yağ tökdü. Daha sonra əvəzlənərkən ədəbsiz əl jestini kapitana yaraşmayan tərzdə qonaqlara ünvanladı. Məhz onun bu hərəkətindən sonra stadionda aləm bir-birinə dəydi. Bəs 30 yaşlı yarımmüdafiəçinin bu aqressiyasının arxasında nə dayanırdı?
Prosport.Az məsələnin kökünü araşdırıb. Məsələ burasındadır ki, Müşfiq Teymurov hələ 2 il əvvəl Mingəçevirdə yerli azarkeşlərlə mübahisə yaşayıb. Region Liqası çərçivəsində keçirilən matçlarda Mingəçevir "Energetik"i "Karvan"ı Yevlaxda 2:0, öz meydanında isə 2:1 məğlub edib. Həmin vaxt da Yevlaxda doğulmuş Müşfiq "Karvan"ın şərəfini qoruyub.
Bildiyimizə görə, "Mingəçevir" tərəfi baş hakim Rövşən Rəcəbovun idarəçiliyindən PFL və AFFA Hakimlər Komitəsinin sədri Barış Şimşəyə şikayət ünvanlayıb. Məsələn, vurulan 1-ci və 2-ci qollar mübahisəyə açıq standard zərbələrdən sonra vuruldu. Üstəlik, Müşfiq Teymurov ilk hərəkətində qırmızı vərəqə ilə cəzalana bilərdi. Bu azmış kimi, Rövşən Rəcəbov çimərlik futbolu millimizin və "Mingəçevir"in qapıçısı Elçin Qasımovu da cəzalandırdı.
Xatırladaq ki, hələ oyundan əvvəl mingəçevirlilər bu təyinatdan narazı qalıb. 2 il əvvəl "Region Liqası"nın 1/4 final mərhələsinin cavab oyunu çərçivəsində "Cəbrayıl" – "Energetik" matçında onun idarəçiliyi böyük qalmaqala səbəb olub, köməkçiləri döyülüb. Nəticədə oyun yarımçıq dayandırılıb. Ötən il "Qaradağ Lökbatan"la oyunda da "Mingəçevir"ə qarşı idarəçiliyi bərbad olub. Belədə bu hakimi bu oyuna təyin etməkdə məqsəd nə idi? Bakı Olimpiya Stadionunda AFFA Hakimlər Komitəsinin sədri Barış Şimşəyə bu barədə verdiyim suala onun cavabı belə olmuşdu: "Xəbərim var ki, "Mingəçevir" bu hakimdən narazıdır. Ancaq biz hər klubun narazılığına görə hakim təyinatı edə bilmərik". Artıq sözə ehtiyac yoxdur...