“Azərbaycan yaxşı futbol oynayan komandalardan biridir”.

Prosport.Az xəbər verir ki, bunu İordaniya millisinin baş məşqçisi Hüseyn Ammuta Bakıda Azərbaycan yığmasına qarşı keçirəcəkləri beynəlxalq yoldaşlıq oyunundan əvvəl mətbuat konfransında deyib.

54 yaşlı mütəxəssis sabahkı görüşə hazırlaşmaq üçün çox vaxtlarının olmadığını vurğulayıb: “Norveçlə qarşılaşmadan sonra Azərbaycanla matça hazırlaşmaq üçün cəmi 2 məşq keçmək imkanımız var. Bilirik ki, Azərbaycan Avropanın güclü komandalarından biri deyil. Buna baxmayaraq, rəqibə hörmətlə yanaşırıq. Sabahkı matçda yaxşı nəticə qazanıb, təlim-məşq toplanışını uğurlu bitirmək istəyirik”.

O, “Qəbələ”nin yarımmüdafiəçisi Ömər Ruhaninin yığmadan kənarda qalmasına da münasibət bildirib: “Onu izləyirik. Növbəti toplanışlarda milliyə çağırıla bilər. Daha çox sabahkı oyuna köklənirik. Rəqibimizin son 4 görüşünü izləmişik. Sabahkı qarşılaşmada da yaxşı nəticə qazanaraq geri qayıtmaq istəyirik”.

Qeyd edək ki, sabah keçiriləcək Azərbaycan – İordaniya matçı saat 20:00-da başlayacaq.