UEFA Millətlər Liqasının I turunda Litva ilə səfərdə 1:1 hesablı heç-heçə edən Azərbaycan milli komandasının futbolçusu Musa Qurbanlı matçdan sonra jurnalistlərin suallarını cavablandırıb.

Prosport.Az xəbər verir ki, gənc hücumçu ilk növbədə qarşılaşmanın nəticəsini dəyərləndirib:

“Nəticə ilə bağlı əsas məqsədimiz qələbə qazanmaq idi. İstəyirdik ki, qalib gəlib xalqımızı sevindirək, çünki bu gün bizim üçün xüsusi gündür, Anım Günüdür. Düşünürəm ki, səfərdə alınan 1 xal da pis sayılmaz. Ən azından Bakıya 1 xalla qayıdırıq. İnanıram ki, doğma azarkeşlərimiz önündə Litva və Lixtenşteynlə keçiriləcək oyunların hər birində qələbə qazanacağıq. Əsas odur ki, qrupda birinci yeri tutaq”.

Futbolçu rəqibin fiziki üstünlüyünə və komandamızın oyununa da toxunub:

“Rəqib həqiqətən yaxşı komanda idi, bunu gözləyirdik. Fiziki cəhətdən çox güclü, boylu-buxunlu futbolçulardan qurulmuş kollektivdir. Standart vəziyyətlərdə və uzun ötürmələrdə yaxşı təsir bağışlayırlar. Komanda olaraq pis mübarizə aparmadıq, lakin əlbəttə ki, bundan da yaxşı oynaya bilərdik. Meydandakı səhvlərimizdən düzgün nəticə çıxarıb, Bakıdakı cavab qarşılaşmasında daha kəsərli hücumlarla qələbəni təmin edəcəyik”.

Kaunas şəhərindəki “Darius və Girenas” stadionunda baş tutan matç 1:1 hesabı ilə yekunlaşıb. Görüşdə yığmamızın qoluna 14-cü dəqiqədə Mahir Emreli imza atıb.