UEFA Millətlər Liqasında Litva ilə səfərdə 1:1 hesablı heç-heçə edən Azərbaycan milli komandasının yeganə qolunun müəllifi Mahir Emreli qarşılaşmadan sonra jurnalistlərin suallarını cavablandırıb.
Prosport.Az-ın Litvaya ezam olunmuş əməkdaşının da iştirak etdiyi müsahibəni təqdim edirik:
“Nəticə, məncə, müəyyən qədər ədalətli oldu. Amma oyunun bəzi məqamlarına və 100 faizlik qol epizodlarına baxsaq, düşünürəm ki, biz daha çox şans əldə etdik. İlk hissədə topla daha çox nəzarət edən tərəf idik. İkinci yarıda isə rəsmi matçın təzyiqindən bəzi diqqətsizliklər oldu və üstünlük rəqibə keçdi. Buna baxmayaraq, onlara real qol şansı vermədik. Yaxşı epizodlarımız var idi və qalib gələ bilərdik. Xüsusilə bu gün ölkəmizi sevindirmək istəyirdik. Təəssüf ki, heç-heçə alındı, amma artıq bu oyunu unudub qarşıdakı iki matçda qələbə qazanmağa köklənməliyik”.
Hücumçu baş məşqçi Ayxan Abbasovun fasilədə futbolçulara verdiyi tapşırıqları və komandanın göstərdiyi reaksiyanı xüsusi vurğulayıb:
“Baş məşqçimizin ilk qeyd etdiyi məqam qol buraxdıqdan sonra komandanın göstərdiyi reaksiya oldu. Bu, çox vacib idi. Qoldan sonra topu götürüb mərkəzə qaçdım, uşaqlar başlarını yuxarı qaldırdılar və hamımız bir-birimizə dəstək olduq. İkinci hissəyə çıxanda da inanırdıq ki, qolların davamı gələcək. Ayxan müəllim tapşırdı ki, oyuna nəzarət edək, müdafiədə səhvsiz oynayaq. Dedi ki, qol vura bilməsək də, artıq qol buraxmamalıyıq. Meydanda olanlar da, oyuna sonradan daxil olanlar da tapşırığı layiqincə yerinə yetirdilər”.
Emreli xüsusi günlərdə fərqlənməyin onun üçün böyük fəxr olduğunu bildirib:
“Səmimi deyim, əsas motivasiyam qolumun məhz Anım Gününə təsadüf etməsi idi. “Qarabağ”da oynayanda da Şuşanın azad olunduğu gün və ya əsgər salamı verəndə bu hisslərə həxüsusi yanaşmışam. Daxilimdəki vətənpərvərliyi gizlədə bilmirəm. Avropada bunu bəzən fərqli qarşılasalar da, mən belə insanam. Bu qol karyeramda xatırlayacağım ən önəmli qollardan biri kimi qalacaq. Təbii ki, milli komandada bombardirlər siyahısında Emin Mahmudova da çatmaq istəyərdim”.