"Sabah daha böyük güc və sürət tələb olunacaq".
Prosport.Az xəbər verir ki, bu sözləri Litva millisinin baş məşqçisi Edqaras Yankauskas UEFA Millətlər Liqasının D Divizionunda Azərbaycan seçməsi ilə keçirəcəkləri oyun barədə danışarkən deyib.
Mütəxəssis bildirib ki, Lixtenşteynlə matç komandadan böyük fiziki resurs tələb etməyib və əsas diqqət qarşıdakı görüşə yönəldilib: “Futbolçular lazımi nəticəni əldə etdilər. Sabahkı oyunu düşünmələri də tamamilə məntiqli idi. Əsas məsələ meydanda razılaşmalarımızı necə yerinə yetirmələri və konsentrasiyaları idi”.
O, Azərbaycan millisinin daha güclü və texnikalı rəqib olduğunu vurğulayıb. “Yaxşı məqamları sabahkı oyuna da daşımalıyıq. Əlbəttə, daha böyük güc və sürət tələb olunacaq. Azərbaycan millisi əvvəlki rəqibimizdən daha güclü və texnikalıdır. Onların beynəlxalq təcrübəyə malik, Çempionlar Liqasında çıxış edən futbolçuları var. Bu, daha yüksək səviyyəli rəqibdir”.
Baş məşqçi heyətdə dəyişikliklərin olacağını da bildirib. O, zədə səbəbindən Piyus Şirvisin bu oyunda meydana çıxa bilməyəcəyini təsdiqləyib: “Düşünürəm ki, yaxşı heyətimiz və ehtiyat oyunçular skamyasında kifayət qədər güclü futbolçularımız var. Dəyişikliklər olacaq, amma bu, mütləq rəqibin gücü ilə bağlı deyil. Futbolçuların fiziki vəziyyəti, zədələrdən sonra keçən müddət və klublarında aldıqları oyun vaxtı kimi amilləri nəzərə alırıq”.
Yankauskas Azərbaycan yığmasının Litvanın əsas üstünlükləri kimi standart vəziyyətlərdə və sürətli hücumlarda oynadığını qeyd etməsinə də münasibət bildirib. “Topu qazandıqdan sonra mümkün qədər tez hücuma keçmək müasir futbolun əsas prinsiplərindən biridir. Çünki həmin anda rəqibin müdafiəsi tam təşkilatlanmış olmur. Biz özümüz də künc zərbəsindən sonra əks-hücum nəticəsində qapımızda təhlükə yaşamışıq. Buna görə hücum edərkən müdafiəni də düşünmək vacibdir”.
“Hazırda “Sabah”da baş məşqçi işləyən yerlim Valdas Dambrauskasla qarşılaşma öncəsi danışmamışam. Onun komandası ilə qazandığı tarixi uğura görə çox sevinirik və gələcəkdə uğurlar arzulayırıq. Azərbaycanda olduğumuz zaman, düşünürəm ki, görüşmək, fikirlərimizi və məsləhətlərimizi bölüşmək üçün vaxt tapacağıq. Amma hazırda öz topladığımız biliklərə və hazırladığımız informasiyaya əsaslanırıq. Kifayət qədər məlumatımız var və hazırıq”, – deyə mütəxəssis vurğulayıb.
Komandaların daha sonra Bakıda cavab oyunu keçirəcəyini bildirən çalışırdırıcı hazırda yalnız Kaunasdakı görüşə fokuslandıqlarını vurğulayıb: “Bir neçə gün ərzində komandanı bir neçə fərqli ssenariyə hazırlamaq mümkün deyil. Biz hər oyuna ən vacib qarşılaşma kimi yanaşırıq. Hazırda bütün diqqətimiz bazar günü keçiriləcək oyundadır. Bu matç bizim üçün prioritetdir”.
Qeyd edək ki, sentyabrın 27-də Kaunasda keçiriləcək qarşılaşma Bakı vaxtı ilə saat 17:00-da başlanacaq.