Futbol üzrə əsas millimiz sabah UEFA Millətlər Liqasının D yolunda Litva yığması ilə ilk matçına çıxacaq.
Prosport.Az-ın Kaunasa ezam olunmuş əməkdaşının sözlərinə görə, matç yerli vaxtla saat 16:00-da (Bakı vaxtı ilə saat 17:00) başlayacaq.
Bəs oyun öncəsi Kaunasdan hansı xəbərlər var?
Millimizdə üzlər gülür
Komandamızda zədəli futbolçu yoxdur. Oyundan öncə Mahir Emreli və Abdullah Xaybulayevdə yüngül zədə olsa da, artıq onlar da qaydasındadır. Bunu baş məşqçi Ayxan Abbasov da, media önünə çıxan Mahir Emreli də təsdiqlədi. Bir sözlə, sabah Mahiri böyük ehtimalla, start heyətdə görəcəyik.
Litvalılar motivasiyalıdır
Həm Litva, həm də Azərbaycan milliləri oyuna motivasiyalı çıxır. Hər iki komanda son matçını qalib başa vurub. Biz Tacikistana Bakıda "Turan Tovuz"un qapıçısı Oleq Baklovun avtoqolu sayəsində qalib gəlmişik. Ancaq bu, yoxlama oyunu zamanı qeydə alınıb.
Bizdən fərqli olaraq, litvalılar artıq Millətlər Liqasında rəsmi oyuna çıxıb. Onlar səfərdə Lixtenşteynə 2:0 qalib gəlib və qrupun hazırkı lideridir.
Baltikyanı ölkə təmsilçisi Lixtenşteynlə oyunda meydan sahiblərinin "çərçivə"yə 1 zərbə vurmasına belə, imkan verməyib. Özləri isə 16 zərbədən 7-ni "çərçivə"yə tuşlayıb, bunlardan 2-si qolla nəticələnib. Qolları Almaniyanın "Energi" (Kotbus) klubunun yarımmüdafiəçisi Lukas Mixelbrink və Latviya əsilli, Çexiya "Slovaçko"sunda çıxış edən yarımmüdafiəçi Artuur Doljnikov vurub. Ümumiyyətlə, Litva millisinin heyətində legioner həyatı yaşayan çox futbolçu mövcuddur.
Qalib tərəf üstünlüyə yiyələnəcək
İndiyədək Litvanın əsas millisi ilə 3 dəfə qarşılaşmışıq. Lakin bu ilk matç olacaq ki, tərəflər rəsmi oyunda üz-üzə gələcək.
1998-ci ildə Litvanı 2:1 məğlub etsək də, 10 il sonra Litva millisi evdə 1:0 üstün olub. 2019-cu ildə tərəflər arasında sonuncu qarşılaşmada isə hesab açılmayıb. Göründüyü kimi, bu matçda qalib tərəf həm də statistikada üstünlüyə yiyələnəcək.
Hava futbola imkan verəcək
Oyunun keçiriləcəyi sabah – 27 sentyabr tarixində havada temperaturun dərəcəsi yüksələcək. Bunadək yağış və çiskinli hava ilə müşayiət olunan Kaunas səması həmin gün günəşli olacaq. Temperatur isə 18 dərəcəni göstərəcək.
Kaunas stadionu niyə 2 nəfərin adını daşıyır?
Bu stadionun tarixi uzun illərə dayanır. 1925-ci ildə açılışı olmuş Kaunas stadionu sonuncu dəfə 2022-ci ildə yenilənib. Bu stadion hazırda Litvanın məşhur "Jalqiris Qrup" şirkətinə məxsusdur. Arena Daryus və Qirenasın adını daşıyır.
Nadir hallarda hansısa stadionun 2 nəfərin adını daşıdığını görürük. Bəs bu şəxslər kim olub?
Steponas Daryus və Stasis Qirenas 1933-cü ildə "Litvanika" adlı təyyarə ilə ABŞ-dən Litvaya uçan pilotlar olub. Təyyarə Kaunasa 650 km qalmış o vaxtkı Almaniya ərazisində, indiki Polşanın Pşelnik kəndi yaxınlığında qəzaya uğrayıb və hər iki pilot dünyalarını dəyişib. Maraqlısı budur ki, Daryus həm də 1922-ci ildə Litvanın LFLS komandası ilə ölkənin ilk çempionluğunu qazanıb. Ad qoyularkən 2 pilot eyni anda öldüyü üçün bu amil nəzərə alınıb.
Stadion 15026 tamaşaçı tutumuna malikdir. 2023-cü ildən Litva millisi ev oyunlarını demək olar ki, paytaxt Vilnüsdən sonra 2-ci böyük şəhər olan Kaunasın bu arenasında keçirir. UEFA-nın 4-cü kateqoriyalı stadionu sayılır.
Səbuhi Musa
Kaunas
Jurnalistlərin Litva səfəri AFFA-nın təşkilatçılığı və "Misli"nin dəstəyi ilə həyata keçirilir.