Azərbaycan millisinin baş məşqçisi Ayxan Abbasov Millətlər Liqasında sabah Litvaya qarşı keçirəcəkləri oyundan əvvəl təşkil olunan mətbuat konfransında iştirak edib.

Prosport.Az-ın Kaunasa ezam olunmuş əməkdaşı xəbər verir ki, mütəxəssis media nümayəndələrinin suallarını cavablandırıb.

– “Sabah”ın litvalı məşqçisi Valdas Dambrauskasla rəqib haqqında danışığınız olub?
– Dambrauskas çempionatımıza rəng qatan məşqçilərdəndir. Çempion oldu, Çempionlar Liqasına vəsiqə qazandı. Ötən il mən də klubda çalışırdım və onunla rəqib idik. Çempionatda belə məşqçinin olması bizim üçün xoşdur. Amma Litva haqqında onunla danışmamışıq.

– Şansları necə dəyərləndirirsiniz?
– Litva ilə güc baxımından yaxınıq. Məncə, şanslar bərabərdir.

– Oyunun 27 sentyabra, Anım Gününə təsadüf etməsinə münasibətinizi bilmək istərdim...
– Bizim üçün önəmli gündür. Futbolçularla bu haqda danışmışıq. Milli komanda milli dəyər deməkdir. Bu gün burada olmağımıza görə şəhidlərimizə, qazilərimizə, veteranlarımıza borcluyuq. Düzdür, idman başqadır, amma oyunun bu gündə keçirilməsi bizim üçün bir silah olacaq.

– Ötən il Millətlər Liqasının gedişində yığmaya baş məşqçi təyin olundunuz. İndi isə yeni səhifə başlayır. Sizin üçün əsas işin sabahdan başladığını demək olar? Yəni, bütün məsuliyyət üzərinizdə olacaq. Buna hazırsınız?
– Gəldiyimiz gündən hazırıq. Əvvəlcə U-21-də başladıq, sonra Fransa ilə ağır matçda iş başında olduq. Ağır məsuliyyətdir. D Liqasında olmalı deyilik. Çalışmalıyıq ki, qalxaq. Milli komanda olaraq irəliləməliyik. Futbolçular da bunu istəyir.

– Futbolçulara rəqiblə bağlı əsas dediyiniz məqam hansıdır?
– Rəqibin üstünlüklərini komandaya çatdırmışıq. Fərdi bacarıqları olan oyunçulara sahibdirlər. “Torino”da oynayan futbolçuları var, bu, onların komandası üçün motivasiyadır. Bəzi oyunçuları da Çempionlar Liqasında çıxış edir. Futbolçularımıza tam məlumat vermişik. İnanıram ki, uşaqlar taktiki çalışmaların, rəqibin üstünlüklərinin öhdəsindən gələ biləcək.