"Qarabağ"ın sabiq qapıçısı Mateuş Koxalski Azərbaycan klubunda çıxış etdiyi vaxt aldığı təklifləri açıqlayıb.
Prosport.Az xəbər verir ki, hazırda "Vyeçista"da çıxış edən Polşa millisinin qapıçısı yay transfer dönəmində karyerasını davam etdirmək üçün qarşısında olan variantlardan danışıb.
Koxalski bildirib ki, onun qarşısında Avropanın nəhəng klublarından seçim olmayıb: “Belə deyil ki, mənim qarşıma superliqaların superklubları arasında seçim qoyulmuşdu, amma mən “Vyeçista”nı seçdim. Xeyr, ümumiyyətlə belə olmayıb. Əvvəlcə onu qeyd edək ki, “Qarabağ” bu mövsüm ümumiyyətlə avrokuboklara və hətta Konfrans Liqasına da vəsiqə qazana bilmədi. Ona görə də Çempionlar Liqasından imtina edib Ekstraklasaya qayıtmağım kimi bir vəziyyət olmayıb”.
26 yaşlı qolkiper “Qarabağ”ın onu komandada saxlamaq istədiyini, lakin özünün ayrılmaq qərarında olduğunu bildirib. O, Almaniyanın “Borussiya Dortmund” və İtaliyanın “Napoli” klublarına ilə bağlı yayılan məlumatlara da aydınlıq gətirib: “Qarabağ” məni satmaq istəmirdi. Əksinə, mənə daha yaxşı şərtlərlə yeni müqavilə təklif etdilər. Amma açıq şəkildə bildirdim ki, ayrılmaq istəyirəm. Çempionlar Liqasında yaxşı çıxış etdik və mən daha irəli, daha yüksək səviyyəyə getmək istəyirdim. “Borussiya Dortmund” və ya “Napoli”nin mənimlə maraqlandığı deyilirdi. Ola bilsin, bu, həqiqət idi, amma həmin klublardan heç birindən rəsmi sorğu gəlmədi”.
Polşalı qapıçı “Qarabağ”da ikən real olaraq aldığı təkliflərin sayını da açıqlayıb: “Əslində cəmi 2 təklifim var idi: biri Birləşmiş Ərəb Əmirliklərindən (BƏƏ – red.), digəri isə Bolqarıstanın “Ludoqorets” klubundan. BƏƏ-yə gedə bilərdim, amma karyeramın sonlarına yaxın ora getməyi düşünərdim. Onsuz da bunun mənim başıma gələcəyini düşünmürəm, çünki karyeramı Avropada başa vurmağa üstünlük verərdim. “Ludoqorets”ə isə getmədim, çünki komanda avrokuboklara vəsiqə qazana bilmədi. Yalnız ölkə çempionatında oynayacaqdımsa, Bolqarıstan çempionatındansa Polşa çempionatına üstünlük verirəm”.
Koxalski yayda Danimarkanın aparıcı klublarından birindən də təklif aldığını və həmin keçidin niyə baş tutmadığını açıqlayıb: “İdeal variant “Qarabağ”dan daha güclü liqaya keçmək olardı. Orada oynayıb daha böyük klublara keçid üçün tramplin əldə edə bilərdim. Nədənsə bu transfer baş tutmadı. Vaxtın getdiyini görərək sentyabrın 8-də “Vyeçista” ilə müqavilə imzaladım. Müqavilə üç illikdir, amma onu tam başa vuracağım çox şübhəlidir. Bilirəm ki, yayda daha yaxşı klub tapmalıyam. Qışda bunu etmək mümkün deyil, çünki bu mövsüm artıq iki klubda çıxış etmişəm. Qaydalar isə üçüncü klubda oynamağa icazə vermir”.
Koxalski “Vyeçista” ilə 3 illik müqaviləsinin olmasına baxmayaraq, gələcəkdə daha güclü Avropa liqasına keçmək istədiyini də bildirib: “Qapıçılar üzrə milli komandanın məşqçisi Andjey Dovidzyukla vəziyyətim barədə danışdım. O, Polşaya qayıtmağımın səbəblərini anlayışla qarşıladı. Bundan sonra nə olacaq? Görəcəyik. Mən bilirəm və “Vyeçista” da bilir ki, növbəti addımı atmaq və Avropanın liqalarından birinə getmək istəyəcəyəm. Milli komandada qalmaq və əsas heyətdə yer uğrunda mübarizə aparmaq üçün Polşadan daha güclü liqada oynamalıyam. Yaxud “Vyeçista” ilə sadəcə elitada qalmaqdan daha böyük nəticə əldə etməliyəm”.
Qeyd edək ki, Mateuş Koxalski “Vyeçista”dan Polşa millisinin heyətinə dəvət alan ilk futbolçu kimi tarixə düşüb. “Qarabağ”ın heyətində 41 liqa oyununda meydana çıxan qapıçı 19 matçda qapısını toxunulmaz saxlayıb. Onun Çempionlar Liqasında isə 10 oyunu var.