Yay fasiləsində “Qarabağ”dan “Seltik”ə transfer olunan Kamillo Duran problemlə üzləşib.

Prosport.Az Kolumbiya mətbuatına istinadən xəbər verir ki, 24 yaşlı futbolçu milli komandaya çağırılsa da, debütü gecikə bilər.

Cənubi amerikalılar ABŞ-da Meksika, Paraqvay və Peru yığmaları ilə yoldaşlıq görüşləri keçirəcək. Lakin Duran sənədlərində problem yarandığı üçün millidən kənarda qalıb. Baş məşqçi Nestor Lorenzo anlaşılmazlığın tezliklə aradan qaldırılacağına və ilk matça qədər forvardın düşərgəyə qoşulacağına inandıqlarını açıqlayıb.

Britaniya mətbuatı isə Duranın tezliklə Avropanın nəhəng klublarından birinə transfer edilə biləcəyini yazıb. Bildirilib ki, bu mövsüm bütün turnirlərdə keçirdiyi 12 oyunda 6 qol, 3 məhsuldar ötürmə ilə yadda qalan Duran artıq skautların “radarına” düşüb. Vurğulanıb ki, forvard bu performansı davam etdirərsə, “Seltik” mövsümün sonunda onun transferindən yüksək məbləğdə gəlir əldə edə bilər.

“Seltik” Kamilo Duranı yayda “Qarabağ”dan 6 milyon funt-sterlinqə alıb.