"Azərbaycanda ilk dəfə işləmirəm. Burada əvvəllər də işlədiyimə görə mentaliteti bilirəm, futbolçuların bir qismini tanıyıram. Bakıda kifayət qədər dostlarım da var".

Prosport.Az xəbər verir ki, bu sözləri “Araz-Naxçıvan”ın yeni baş məşqçisi Yuri Maksimov klubun mətbuat xidmətinə açıqlamasında deyib.

Ukraynalı mütəxəxssis Azərbaycan Premyer Liqasının maraqlı keçdiyini bildirib: “Bunun nəticəsidir ki, Azərbaycanın UEFA Çempionlar Liqasının qrup mərhələsində təmsilçisi var. “Araz-Naxçıvan”a gəldikdə, “İmişli” ilə oyun istisna olmaqla, qalan matçlarını izləmişəm. Komanda, heyətlə bağlı ümumi məlumatım var. Harada axsadığımızı, harada üstünlük qazana biləcəyimizi bilirəm. İşləmək lazımdır. Sabah kollektivlə ilk məşqimizə çıxacağıq. Bilirəm ki, 4 futbolçumuz milli komandaların düşərgəsinə yollandığına görə bizə sonra qoşulacaq”.

Baş məşqçi qarşıdakı hədəfləri də açıqlayıb: “İndiki məqamda ilk tapşırığımız turnir cədvəlinin sonuncu pilləsindən üst sıralara yüksəlməkdir. Komanda özünə inanmalıdır. Mümkün qədər üst sıralara qalxmalıyıq. İndi bizim üçün çox həssas məqamdır. Yenə deyirəm, asan olmayacaq. Çünki çempionat çox rəqabətli keçir, komandalar güclüdürlər və hər birinin müəyyən məqsədi var”.

Qeyd edək ki, ukraynalı mütəxəssislə müqavilə 2026-2027-ci illər mövsümünün sonuna qədər nəzərdə tutulub.