Azərbaycan milli komandasının müdafiəçisi Rəhman Daşdəmirov Tacikistan yığmasına qarşı keçiriləcək yoldaşlıq matçından əvvəl təşkil olunan mətbuat konfransında iştirak edib.

Prosport.Az xəbər verir ki, təcrübəli futbolçu rəqibin oyun üslubunun hərtərəfli təhlil edildiyini bildirib.

Daşdəmirov komandanın əsas məqsədini belə açıqlayıb: "Tacikistan nə istədiyini bilən komandadır. Biz də rəqibin oyununu yaxşı analiz etmişik. Baş məşqçimiz Ayxan Abbasovun verdiyi tapşırıqları meydanda düzgün yerinə yetirməyə çalışacağıq. İstəyimiz qalib gəlmək və xalqımızı sevindirməkdir. Bu, Millətlər Liqasının oyunları öncəsi son hazırlıq matçımızdır. Ona görə də görüşə ciddi yanaşırıq".

Qeyd edək ki, Azərbaycan – Tacikistan yoldaşlıq oyunu sentyabrın 23-də 8-ci km qəsəbə stadionunda baş tutacaq. Matçın start fitı saat 20:00-da səslənəcək.