Ukraynada “Qızıl istedad” layihəsi çərçivəsində 2005-2006-cı il təvəllüdlülər arasında avqustun ən yaxşı gənc futbolçularının adları açıqlanıb.

Prosport.Az xəbər verir ki, 133 ekspertin iştirak etdiyi sorğunun nəticəsinə əsasən, siyahıya Kiyev “Dinamo”sunun futbolçusu Matvey Ponomarenko başçılıq edir.

20 yaşlı hücumçu ötən ay vurduğu 3 qol sayəsində bu ada layiq görülüb. Ponomarenko Konfrans Liqasının təsnifat mərhələsində “Qarabağ”la (1:0) və Ukrayna Premyer Liqasında “Veres”lə (2:1) oyunlarda “Dinamo”ya qələbə qazandıran qola imza atıb, “Kolos”u 2:1 hesabı ilə məğlub etdikləri matçda isə hesabı açıb.

Ekspertlərin 90-ı “Dinamo”nun forvardına səs verib. O, ümumilikdə 206 xal toplayıb.

Siyahının ön sıralarında “Xarkov”da çıxış edən Azərbaycanəsilli Ramik Hacıyev də var. 21 yaşlı sol vinger 137 xalla ayın ən yaxşı 3-cü futbolçusu adına layiq görülüb. Bakıda anadan olan Hacıyev Ukraynanın U-19, U-20 və U-21 yığmalarının formasını geyinib.

Ekspertlər məşqçilərdən, tanınmış sabiq futbolçulardan və futbol sahəsində ixtisaslaşmış jurnalistlərdən təşkil olunub.

Qeyd edək ki, artıq 14 ildir “Qızıl istedad” layihəsi çərçivəsində hər ayın ən yaxşı gənc ukraynalı futbolçusu seçilir.