“Turan Tovuz”da vəziyyət gərginləşib. Klub rəhbərliyi arasında idarəetmə ilə bağlı fikir ayrılığı tezliklə ciddi dəyişikliyə səbəb olacaq.

Prosport.Az futbolinfo.az-a istinadən xəbər verir ki, ötən mövsümün sonunda avrokuboklardan kənarda qalan qərblilər şok yaşadı. Müxtəlif adamların günahkar olması ilə bağlı versiyalar ortaya atılsa da, klub bununla bağlı rəsmi açıqlama yaymadı. İdarə Heyətinin sədri Ehtiram Quliyev “keçmişdən danışmayaq” deməklə problemin üstünü örtdü, birbaşa məsuliyyət daşıyan şəxsin adını açıqlamadı. Ya öz günahını bildiyindən, ya da kluba doldurduğu dostlarını hədəfə gətirmək istəmədiyindən yayın əsas hadisəsini ört-basdır etdi.

Lakin bu durum klubun sponsorlarını hiddətləndirib. Hər nə qədər ictimaiyyətdə tovuzluların himayəçisinin Quliyev və onun rəhbərlik etdiyi şirkət olduğu təəssüratı yaransa da, həqiqət başqadır. Klubun bir neçə sponsoru var və Ehtiram bəy onlardan birdir. O, klubun idarə edilməsində önə çıxarılan şəxsdir.

Son olaylar, həmçinin Quliyevin iğtişaşa səbəb ola biləcək məlum qalmaqallı açıqlamaları ona dəstəyi azaldıb. Elə bu səbəbdən yayda gələcəkdə onu əvəz etməsi planlaşdırılan Həsən Zeynalov kluba gətirilib. Bu şəxs Quliyevə müavin gətirilsə də, əslində, işi öyrənmək və zamanı gələndə hərəkətə keçmək məqsədi güdürdü.

O gün yetişib. Artıq klubun daxilində idarəçilik problemlərinin olduğu, rəhbər şəxslər arasında ciddi fikir ayrılıqlarının baş qaldırdığı barədə xəbərlər var. Gec-tez Ehtiram Quliyev postundan ayrılacaq, onu məhz Həsən Zeynalov əvəz edəcək. Eyni proses “Hünər”də də reallaşa bilər.

Zeynalov Quliyevin yaxınlarının işə münasibətindən, idarəetmədə xoş olmayan addımlarından narazıdır. Bir neçə dəfə müavini bununla bağlı Ehtiram bəyə irad bildirib, lakin istəyinə çatmayıb. Daxili narazılıqlar artıq qarşıdurma səviyyəsinə çatıb və ciddi dəyişikliklər uzaqda deyil.