Azərbaycan Premyer Liqasının VI turunda səfərdə “Şamaxı”ya 1:2 hesabı ilə uduzan “Araz-Naxçıvan”ın baş məşqçisi Zaur İsmayılov matçdan sonra keçirilən mətbuat konfransında jurnalistlərin suallarını cavablandırıb.

Prosport.Az xəbər verir ki, mütəxəssis ilk növbədə görüş haqqında təəssüratlarını bölüşüb.

– Rəqibi qələbə münasibətilə təbrik edirəm. İlk hissədə müdafiədə 2 kobud səhvə yol verdik və qapımızda penalti qolları gördük. Hesabı bərabərləşdirsək də, yenidən səhv edib uduzduq.

– Qapınıza təyin olunan 2 penalti qərarı ilə razısınız?

– 1-ci penalti epizodu bir az mübahisəli idi. Hakim qərar verdikdən sonra VAR-a çağırıldı və epizoda uzun müddət baxıldı. Qapıçımız 1-ci topu çıxarmışdı, görünür, 2-ci təmasın olub-olmamasına baxırdılar. Lakin 2-ci epizoddakı penalti qərarı doğru idi.

– Ağadadaş Salyanskinin ardıcıl 3-cü matçda qol vurmasını necə dəyərləndirirsiniz?

– Əlbəttə, o, istər ehtiyatda olanda, istərsə də məşqlərdə həmişə çalışır. “Qarabağ”la oyundan sonra əsas heyətə düşdü və ardıcıl qollar vurmağa başladı. Bu oyunda 2-ci qolu da vura bilərdi, təəssüf ki, zərbəsi dirəkdən döndü. Komanda uduzsa da, onun hər matç fərqlənməsi sevindirici haldır.

– Milli fasiləyə qədərki dövrü uğursuz saymaq olar. 2 həftəlik fasilədə əsasən nəyin üzərində işləyəcəksiniz?

– Müdafiədə kobud səhvlərimiz olur, maksimum bu xətaların üzərində işləməliyik. Eyni zamanda hücumda yaranan imkanlardan daha səmərəli istifadə etməliyik. Fasilə dövründə də çatışmayan cəhətlərimizi aradan qaldırmağa çalışacağıq.