Azərbaycan Premyer Liqasının VI turunda “İmişli” səfərdə “Sabah”a 1:3 hesabı ilə məğlub olub.
Qarşılaşmadan sonra “İmişli”nin yeni transferi Ronaldo de Souza görüşlə bağlı fikirlərini Prosport.Az-la bölüşüb.
– Matç haqqında fikirləriniz nələrdir?
– Qarşılaşmanın çətin keçəcəyini əvvəlcədən bilirdik. Komanda olaraq baş məşqçinin verdiyi tapşırıqları yerinə yetirməyə çalışdıq. Sonadək mübarizə apardıq və hər bir futbolçu meydanda əlindən gələni etdi. Təəssüf ki, yekun nəticə bizim istədiyimiz kimi olmadı. Buna baxmayaraq, komanda şəklində yaxşı oyun göstərdik.
– 6 turdan sonra cəmi bir qələbəniz var. Bu vəziyyəti necə qiymətləndirirsiniz?
– Əlbəttə, biz də daha çox qələbə qazanmaq istəyirik. Qarşıdakı matçların asan olmayacağını başa düşürük. Milli fasilə zamanı daha çox işləyəcək, çatışmazlıqlarımız üzərində çalışacağıq. Növbəti rəqibimiz “Qarabağ”dır və onların güclü komanda olduğunu bilirik. Amma bu, bizim şansımızın olmadığı anlamına gəlmir. Futbolda hər nəticə mümkündür. Qələbə üçün əlimizdən gələn hər şeyi edəcəyik.
– Hesab 2:1 olduğu vaxt oyunun sonuna az qalırdı. Sizcə, ikinci qolu vurmaq mümkün idi?
– Bəli, belə imkanımız var idi. Son dəqiqələrdə hesabı dəyişmək üçün bütün gücümüzü ortaya qoyduq. Təəssüf ki, istəyimiz baş tutmadı. Mübarizə apardıq, amma nəticə əldə edə bilmədik.
– Sizin üçün oyunun ən çətin bölümü hansı oldu?
– Məncə, oyunu ayrı-ayrılıqda çətin və asan hissələrə bölmək düzgün deyil. Liqadakı komandaların səviyyəsini bilirik və burada asan qarşılaşma yoxdur. Matçın əvvəlindən təzyiq göstərərək erkən qol vurmağa çalışdıq, lakin bunu bacarmadıq. İlk 20 dəqiqədə rəqibin çoxsaylı hücumlarının qarşısını komanda şəklində düzgün oynadığımız üçün ala bildik. Daha sonra xal qazanmağın mümkün olduğunu gördük və qol vurmağa da nail olduq.
– İlk 20 dəqiqədə “İmişli”nin qol imkanları oldu, lakin bunlardan istifadə edə bilmədiniz. Komandada hücumların sonlandırılması ilə bağlı problem olduğunu söyləmək olar?
– Xeyr, bitiricilik baxımından problemimizin olduğunu düşünmürəm. Futbolda belə hallar normaldır. Biz həmin epizodlarda əlimizdən gələni etdik. Bəzən futbolçu meydanda düzgün qərar verə bilmir. Bundan başqa, hücumçunun vəzifəsi yalnız qol vurmaqdan ibarət deyil. O, lazım gəldikdə müdafiəyə qayıtmalı və komandaya bu istiqamətdə də kömək etməlidir. Bir neçə epizodun uğursuz alınmasına əsasən komandada bitiricilik problemi olduğunu demək düzgün olmaz.