Azərbaycan Premyer Liqasının VI turunda evdə “Neftçi”yə 0:3 hesabı ilə məğlub olan “Qəbələ”nin məşqçisi Amil Ağacanov matçdan sonra keçirilən mətbuat konfransında jurnalistlərin suallarını cavablandırıb.

Prosport.Az xəbər verir ki, mütəxəssis ilk növbədə matç haqqında təəssüratlarını bölüşüb.

– Bilirdik ki, rəqibimiz “Neftçi”dir. Deyiləsi söz çoxdur, bizim üçün ağır məğlubiyyət oldu. Rəqibi yaxşı təhlil etmişdik, heyətlərində aqressiv və keyfiyyətli futbolçuların olduğunu bilirdik. Yeni baş məşqçimizin gəlişi ilə son 2-3 ildə oynadığımız sistemi dəyişmişik. 0:1 hesabına qədər pis oynamırdıq, topa nəzarət edirdik, aqressivlik var idi. Lakin rəqib sonradan sürətli oyunçularını meydana buraxdı. Adekvat dəyişikliklər etsək də, təəssüf ki, belə ağır məğlubiyyətlə üzləşdik.

– Taktiki baxımdan yeni baş məşqçinin əsas tələbləri nədir?

– Əsas istək daha çox topa nəzarət etmək, sürətli keçidlərlə hücumlar qurmaqdır. Hazırkı 4-2-3-1 sistemində məhz bu amillər tələb olunur və gələcəkdə bunun üzərində daha çox çalışacağıq.

– Əcnəbi qapıçı Artur Mottanın hazırlıq durumu necədir və hələ də şans qazanmaması nə ilə bağlıdır?

– Biz heç bir qapıçını komandaya birbaşa əsas heyət üzvü kimi gətirməmişdik, kim güclüdürsə, o da oynayacaq. Heyətimizdə U-20 millisinin üzvü Həbib Hüşənov da var. Sadəcə, gənclər yığmasının toplanışları çox olduğu üçün heyətə rəqabət yaradacaq yeni qapıçı dəvət etdik. Şükürlər olsun ki, hazırda Səlahət Ağayev yaxşı formadadır, Arturun da çıxışından razıyıq. Gələcəkdə imkan olsa, Mottaya da şans verəcəyik.

– Rəqibin dəyişikliklərindən sonra buraxdığınız qollara səbəb nə oldu?

– Bəli, 0:1-ə qədər intizamlı idik. Sonradan meydana daxil olan futbolçuların oyuna adaptasiya olunması bir az çətin olur. Ola bilsin ki, tempə uyğunlaşa bilmədilər və müdafiədə boşluqlar verdik. “Neftçi”nin futbolçularının fərdi keyfiyyəti yüksək olduğundan bu səhvlərimizdən bizi cəzalandırdılar.