UEFA Gənclər Liqasının ilk turunda “Sabah” üzərində 5:0 hesablı qələbə qazanan “Mançester Yunayted”in U-19 komandasının bir futbolçusu əsas kollektivin məşqçi korpusunun diqqətini çəkib.

Prosport.Az Britaniya mətbuatına istinadən xəbər verir ki, İngiltərədəki qarşılaşmada het-trik edən Qabriel Jozef Junior tezliklə “qırmızı şeytanlar”ın heyətində rəsmi debüt edə bilər.

Məsələ burasındadır ki, matçı izləyənlər arasında əsas komandanın köməkçi məşqçisi Travis Binnion da olub. O, baş məşqçi Maykl Karikə məhz Qabriel barədə müsbət raport təqdim edib. Hazırda cəmi 15 yaşı olmasına baxmayaraq, mərkəz hücumçusunun tezliklə əsas kollektivə qoşulması gözlənilir. Karik ilk vaxtlar onun məşqlərə qatılmasını, fiziki forması arzulanan səviyyədə olduqdan sonra isə Qabrielə oyunlarda şans verməyi planlaşdırır.

Qeyd edək ki, Qabriel Jozef Junior İngiltərənin U-17 millisinin üzvüdür.