Nigeriyalı gənc futbolçu Melodi Junior Avropada karyera qurmaq məqsədilə Azərbaycana gəlib.

Prosport.Az sports247.ng saytına istinadən xəbər verir ki, ölkəsində fəaliyyət göstərən futbol akademiyasının yetirməsi olan Junioru nümayəndəsi Samir Əliyev adlı şəxs qarşılayıb.

Maraqlıdır ki, oyunçu konkret olaraq hansısa klubun dəvəti ilə ölkəmizə təşrif buyurmayıb. Bu səfər rəsmi transfer kimi deyil, Azərbaycanda karyera qurmaq üçün yeni imkanın başlanğıcı kimi təqdim olunub.

Gənc futbolçu Azərbaycana gəlişi ilə bağlı ölkəsinin mətbuatına bunları deyib: “Azərbaycana gəlmək mənim üçün böyük fürsətdir. Çünki bu mərhələyə çatmaq üçün nə qədər çalışdığımı bilirəm. Buraya bacarığımı göstərmək, fərqli futbol mühitindən öyrənmək və qarşıma çıxan hər fürsətdən maksimum yararlanmaq üçün gəlmişəm. Arzum inkişafımı davam etdirmək və peşəkar futbolçu olmaqdır”.

Hazırda onun əsas məqsədi yeni mühitə uyğunlaşmaq və mümkün keçid şansından maksimum yararlanmaqdır.