“Qarabağ”ın yarımmüdafiəçisi Aleksey Kaşşuk Ukrayna millisinə çağırıla bilər.

Prosport.Az Ukrayna mətbuatına istinadən xəbər verir ki, yığmanın yeni baş məşqçisi Andrea Maldera legioner həyatı yaşayan ukraynalılardan ibarət siyahı hazırlayıb. Kaşşukun cari mövsümdəki performansı da məşqçilər korpusunun diqqətini çəkib.

26 yaşlı vinger “Qarabağ”ın heyətində artıq 12 matçda iştirak edib, 3 qol, 1 məhsuldar ötürmə ilə yadda qalıb. Kaşşuk Azərbaycan Premyer Liqasının son turunda “Zirə” ilə qarşılaşmada komandasını məğlubiyyətdən xilas edən qola imza atıb. Bildirilir ki, futbolçu bu performansı davam etdirəcəyi təqdirdə onun Ukrayna millisinə çağırılması istisna deyil.

Qeyd edək ki, Aleksey Kaşşuk Ukraynanın aşağı yaş qrupundan ibarət bütün yığmalarında çıxış edib. O, 2024-cü ildən “Qarabağ”ın formasını geyinir.