Azərbaycan Premyer Liqasının V turunun bağlanış matçında “Sabah" Sumqayıtda “Şəfa”nı 3:0 hesabı ilə məğlub edib.
Matçdan sonra “bayquşlar"ın futbolçusu Timateuş Puxaç Prosport.Az-a müsahibə verib.
– Oyunu necə dəyərləndirirsiniz?
– Yaxşı çıxış etdik. Planlaşdırdığımız kimi, rəqibi düzgün qiymətləndirdik, qapımızı toxunulmaz saxladıq və 3 xalı qazandıq. Bu, bizim üçün çox vacibdir. Onlar kifayət qədər yaxşı komandadır. Fiziki cəhətdən güclüdürlər, xüsusilə də ilk dəqiqələrdə müdafiədə yaxşı təşkilatlanmışdılar. Ancaq oyunçularımızın keyfiyyəti yüksəkdir, onları üstələməyin yolunu tapdıq və qollar vurduq. Nəticədən məmnunuq. Artıq “İmişli”yə qarşı oyunun hazırlığına başlayacağıq.
– Çempionlar Liqası oyunundan sonra uzun səfərin yorğunluğu sizə təsir etdi?
– Bütün bu şeylər komandaya təsir edə bilərdi, amma düşünürəm ki, sanki bu dəfə etmədi. Oyundan əvvəl danışdıq, komanda yoldaşlarımla söhbət etdik. Dedik ki, ötən il Premyer Liqadakı oyunlarda qalib gəlib, çempionluq qazandıq. Bu, Çempionlar Liqasında, “Qarabağ”a, “Zirə”yə qarşı matçlarda da eynidir: həmişə 3 xal qazanmağa çalışmalıyıq. Ona görə də diqqəti cəmləmək vacibdir və elə də oldu.
– Çempionlar Liqasından sonra Premyer Liqada oynamaq necədir? Atmosfer və səviyyə fərqini hiss edirsiniz?
– Düzünü desəm, əlbəttə, ÇL oyunu ətrafındakı hər şey gözəldir: azarkeşlər, himn və sair. Amma nəticə etibarilə siz 11 nəfərə qarşı eyni ot örtüyündəsiniz. Mənim üçün Mançesterdə və ya burada oynamağımın heç bir fərqi yoxdur. Bacardığım qədər ən yaxşısını etməliyəm. Futbolçu meydanda bütün diqqətini oyuna yönəltməlidir.
– Amma rəqiblər arasında böyük səviyyə fərqi var...
– Səviyyə, əlbəttə ki, fərqlidir. Dünyanın ən yaxşı komandalarından biri, ən yaxşı oyunçuları ilə oynayırıq. Onlar 100 milyonlarla avro dəyərindədir. Amma fərqi yoxdur, hər komandaya qarşı oynamalısan.
– Çempionluq uğrunda əsas rəqibiniz “Qarabağ”ın “Zirə” ilə 1:1 hesablı heç-heçə etdiyini, sizin isə “Zirə”ni 5:0 hesabı ilə məğlub etdiyinizi nəzərə alsaq, bu nəticələrə necə baxırsınız?
– Bu, mənim komandam deyil, mənim komandam “Sabah”dır. Mən yalnız öz nəticəmə diqqət yetirirəm, digər komandalara fikir vermirəm. Kimin hansı nəticəni əldə etdiyi vecimə deyil. Mən yalnız “Sabah”ın nəticəsi ilə maraqlanıram.
Bahar Rüstəm