Azərbaycan Premyer Liqasının V turunda evdə “Sabah”a 0:3 hesabı ilə uduzan “Şəfa”nın baş məşqçisi Zaur Həşimov matçdan sonra keçirilən mətbuat konfransında jurnalistlərin suallarını cavablandırıb.
Prosport.Az xəbər verir ki, mütəxəssis ilk növbədə matç haqqında fikirlərini bölüşüb.
– İlk hissədə 26-cı dəqiqədə qol buraxana qədər göstərdiyimiz oyundan ümumən razı idim. Topa daha çox nəzarət edir, hücumlara çıxırdıq. Əlbəttə ki, rəqibin səviyyəsini də nəzərə almalıyıq. Bu gün çox yaxşı, cəmi 3–4 gün öncə Mançesterdə matç keçirmiş və əla komplektləşmiş komandaya rəqib olduq. Onlara qarşı layiqli mübarizə apardıq. Sadəcə, buraxdığımız qollar bizi məyus edir. Artıq neçənci matçdır ki, kiçik detallardan və öz səhvlərimizdən qapımızda qol görürük. Bununla belə, komandamın oyunundan narazı qalmadım, əksinə, müsbət təəssürat yaratdı. “Şəfa” öz oyunu ilə bu çempionata rəng qata bilər və gələcəkdə daha yaxşı futbol nümayiş etdirəcəyik.
– “Şəfa” ilk 5 turda ən çox qol buraxan və ən az qol vuran 2 komandadan biridir. Baş məşqçi kimi bu göstəricilər sizi narahat edirmi?
– Əlbəttə, narahat edir. Lakin nəzərə almaq lazımdır ki, daha çox qol buraxdığımız matçlar çempionluq uğrunda mübarizə aparan komandalara qarşı olub. Bu nəticələrlə barışmırıq və lazımi tədbirləri görəcəyik. Ən az qol vuranlar sırasında olmağımıza gəlincə, 5 turdakı rəqiblərimizin səviyyəsinə baxmaq lazımdır. Bizə turnir cədvəli baxımından ən çox təsir edən məğlubiyyət 3-cü turda “İmişli”yə qarşı oldu. Bu gün isə əsas hücumçumuz heyətdə yox idi. Fikrimcə, gələcək oyunlarda bu problemlərin öhdəsindən gələcəyik.
– Qapıçı Nicat Mehbalıyev həm “Neftçi”, həm də “Sabah”la matçlarda oyunun qırılma anlarında səhvlərə yol verdi. Onunla fərdi söhbət aparılacaq, yəni ehtiyat skamyaya göndərilmə ehtimalı var?
– Əvvəl də qeyd etdiyim kimi, məhz detal səhvləri komandaya böyük zərbə vurdu və oyunun qırılma nöqtələri oldu. Nicat bizim futbolçumuzdur, lakin o da anlayır ki, komandada digər qapıçılarımız da var və heyətdə rəqabət mövcuddur. Hər hansı addım atsaq, bu, Nicatı cəzalandırmaq üçün yox, sırf onun inkişafına təkan vermək üçün olacaq.