Azərbaycan Premyer Liqasının V turunun “Sumqayıt” – “Şamaxı” oyunundan (1:1) sonra meydan sahibi komandanın baş məşqçisi Filipe Kandidu jurnalistlərin suallarını cavablandırıb.

Prosport.Az xəbər verir ki, mütəxəssis əvvəlcə görüşlə bağlı fikirlərini bildirib.

– Hər iki hissədə kifayət qədər epizodlar yaratdıq. Bu gün 1 xala layiq deyildik. Komandamda müəyyən inkişaf görürəm. Rəqibimiz təhlükəli idi. Görünür, hələ çalışmalıyıq. Yenə qeyd edirəm, inkişaf edirik, daha yaxşı olacağıq.

– Növbəti oyunlarda qələbə sözünü verə bilərsiniz?

– Bəli, inanıram ki, hər rəqibə qalib gələ bilərik. Arzu edirəm ki, ilk qələbəmizi qazanaq. Bunu çox istəyirik. Futbolçular çox çalışır, yaxşı hazırlaşır. Bəzi futbolçular cəmi 2-3 məşq edib. Qarşıda vaxtımız var, daha yaxşı olmağa çalışacağıq.

– Yeni transfer Banqre haqqında fikirləriniz nədir?

– Yaxşı oyunçu olduğu üçün onu transfer etmişik. Ümid edirəm ki, bizim üçün faydalı olacaq. Həmişə istəyərəm ki, bütün komanda birlikdə hazırlıq keçsin. Yeni formalaşırıq. Bu gün 1 xal qazandıq, bu, kifayət etmir. Növbəti matçlarda qələbə arzulayırıq.

– Qarşıda fasilə olacaq. Bu, sizin üçün faydalıdır?

– Bir tərəfdən yaxşıdır ki, vaxtımız olacaq. Ancaq yəqin ki, 2 futbolçumuz milliyə gedəcək və tam heyət olmadan hazırlaşacağıq. İstənilən halda, oyunçuların yığmaya getməsiylə qürur duyuram.