Rumıniya Futbol Federasiyası aşağı yaş qruplarında valideyn və azarkeşlərin aqressiv davranışlarının qarşısını almaq üçün yeni qayda tətbiq edib.

Prosport.Az xəbər verir ki, federasiyanın İcraiyyə Komitəsi sentyabrın 11-də qara kartın tətbiqini təsdiqləyib.

Yeni qayda 7-16 yaş aralığında keçirilən uşaq və yeniyetmə yarışlarına şamil olunacaq. Məqsəd futbolçuları tribunadan gələn təhqir, təzyiq və aqressiyadan qorumaqdır.

Qaydaya əsasən, hakim əvvəlcə uyğun olmayan davranışla bağlı xəbərdarlıq edəcək. Pozuntu davam edərsə, oyun 10 dəqiqəlik dayandırılacaq. Eyni hal yenidən təkrarlanarsa, hakim qara kart göstərərək qarşılaşmanı tam dayandıracaq.

Qara kart göstərildikdən sonra matçın bərpasına icazə verilməyəcək.

Qayda uşaqların və məşqçilərin təhqir və fiziki təzyiqə məruz qalması, rəqib komandalara qarşı aqressiya, hakimlərin təhqir edilməsi, həmçinin valideyn və azarkeşlər arasında yaranan qarşıdurmalara tətbiq olunacaq.

Federasiya bu qərarla aşağı yaş qruplarında futbol üçün daha təhlükəsiz və sağlam mühit yaratmağı hədəfləyir.