İngiltərənin “Mançester Yunayted” klubunun futbolçusu Markus Reşfordun UEFA Çempionlar Liqasının əsas mərhələsinin ilk turunun “Sabah”la oyununda iştirakı sual altına düşüb.

Prosport.Az İngiltərə mətbuatına istinadən xəbər verir ki, buna səbəb 28 yaşlı hücumçunun Premyer Liqanın III turunda “Everton”la matç zamanı zədələnməsidir.

“Qırmızı şeytanlar”ın baş məşqçisi Maykl Kerrik 2:2 hesabı ilə başa çatan qarşılaşmadan sonra Reşfordun əvəzlənməsinin məhz fiziki vəziyyəti ilə əlaqədar olduğunu bildirib: “Bəli, o, özündə müəyyən narahatlıq hiss etdi. Həmin ana kimi meydanda çox yaxşı təsir bağışladı. Həftə ərzində də dediyim kimi, qayıtdıqdan sonra çox yaxşı çıxış edir. “Everton”la matçda da onun çox sürətli və təhlükəli olduğunu gördük. Düzdür, son anda istədiyi epizodlar tam olaraq alınmadı, amma buna baxmayaraq, çox yaxşı imkanlar əldə etdi və bütün oyun ərzində rəqibə təhlükə yaşatdı”.

Reşford “Everton”la görüşün 70-ci dəqiqəsində Patrik Dorqu ilə əvəzlənib. Futbolçunun oyunu davam etdirə bilməməsi komandanın məşqçilər korpusunda narahatlıq yaradıb.

Qeyd edək ki, sentyabrın 10-da “Old Trafford” stadionunda keçiriləcək “Mançester Yunayted” – “Sabah” qarşılaşması Bakı vaxtı ilə saat 23:00-da başlayacaq.