Azərbaycan Premyer Liqasının IV turunda səfərdə “Qarabağ”a 2:3 hesabı ilə məğlub olan “Araz-Naxçıvan”ın baş məşqçisi Zaur İsmayılov matçdan sonra mətbuat konfransında jurnalistlərin suallarını cavablandırıb.

Prosport.Az xəbər verir ki, mütəxəssis gərgin mübarizəni şərh edib.

– Rəqibi qələbə münasibətilə təbrik edirəm. Çox maraqlı və gərgin oyun keçdi. Təəssüf ki, yenə matçın əvvəlində tez qol buraxdıq. Buna baxmayaraq, 2-ci hissədə hesabı minimuma endirdik. 2-ci qolu yenə standart vəziyyətdən buraxsaq da, sevindirici hal odur ki, çempionatda ilk qollarımızı vurduq, lakin bərabərliyi əldə edə bilmədik və məğlub olduq.

– “Neftçi” ilə oyundan sonra komandada yaxşı mənada dəyişikliklər nəzərə çarpır. “Qarabağ”la matçda nələri dəyişdiniz?

– “Neftçi” ilə matçda da erkən qollar buraxmış və komanda toparlana bilməmişdi. Bu dəfə isə futbolçular yaxşı mübarizə apardılar. 2-ci hissənin əvvəlindən rəqibi öndə sıxmağa başladıq və bunun nəticəsində ilk qollarımızı vurduq.

– “Qarabağ” kimi iddialı rəqibə səfərdə 2 qol vurub xalsız ayrılmaq sizi məyus edir?

– Əlbəttə, lakin “Qarabağ” kimi rəqiblə səfərdə oynamaq çətindir. 2 qolumuzu standart vəziyyətlərdən vurduq, şanslarımızdan istifadə etdik. 1-ci hissənin sonlarında da fəal idik.

– Bu matç qarşıdakı oyunlar üçün komandaya stimul olacaq?

– Bugünkü oyun göstərdi ki, “Qarabağ”a qarşı belə mübarizə aparmaq olar. Belə çıxış növbəti matçlar üçün komandaya böyük stimul verə bilər.