"Neftçi" Misli Premyer Liqasının 4-cü turunda "Şəfa"nı 4:1 hesabı ilə məğlub edib.
Həmin qarşılaşmadan sonra "ağ-qaralar"ın qapıçısı Emil Balayev Prosport.Az-a müsahibə verib.
- Oyunla bağlı nə deyə bilərsiniz?
- Premyer Liqanın debütantına qarşı oynayırdıq. Bilirdik ki, bizim üçün asan olmayacaq. Çünki “Şəfa” qapanacaqdı. Zaur Həşimovun işini qeyd etmək lazımdır. Yaxşı təşkil olunmuş komandadırlar. Özünüz də gördünüz ki, ilk hissə bizim üçün çətin keçdi. Yalnız uzaq məsafədən qol vura bildik. Fasilədən dərhal sonra qapımızda qol gördük. Hesab bərabərləşdikdən sonra üstünlüyü ələ aldıq. Lazımi qolları vurduq və yekunda qələbə qazandıq.
- Demək olar ki, "Neftçi" 1:1-dən sonra ayıldı?
- Ayılmaq yox, sadəcə müəyyən vaxt rəqib oyunumuza, təzyiqimizə tab gətirirdi. Lakin 60-cı dəqiqədən sonra uşaqlar məşqçinin tapşırıqlarını daha yaxşı yerinə yetirə bildilər. Bu da qolları gətirdi.
- Şənbə günü olsa da, azarkeş çox az idi. Sizcə, bu nədən irəli gəlirdi?
- Onu dəqiq deyə bilmərəm. Ən azından "Forza Neftçi"yə təşəkkür edirəm. Onlar üçün evdə, yaxud səfərdə oynamağımızın fərqi yoxdur, hər zaman bizi dəstəkləyirlər. Onların dəstəyi bizi daha da ruhlandırır.
- 4 oyuna 9 xal. Startı "Neftçi" üçün nə dərəcədə uğurlu saymaq olar?
- "Neftçi"nin adı bizi həmişə maksimum nəticələr üçün oynamağa vadar edir. Ona görə biz istərdik ki, keçən tur da maksimum nəticə qazanaq. Lakin alınmadı. Mövsüm uzundur. Önümüzə baxmalıyıq. Səhvlərimizdən nəticə çıxmalı və oyunumuzu daha da yaxşılaşdırmalıyıq.
- VI turdan sonra “Neftçi”ni gərgin qrafik gözləyir. Ardıcıl olaraq "Sabah", "Qarabağ" və "Turan Tovuz"la üz-üzə gələcəksiniz. Demək olar ki, bu 3 oyun öncəsi "Neftçi"nin hədəfi qarşıdakı "İmişli" və "Qəbələ" səfərlərində maksimum nəticə toplamaqdır?
- 2 turdan sonra hələ milli fasiləsi var. Əslində həm "İmişli", həm də "Qəbələ" yaxşı komandadır. Gələn tur Yevlaxda oynayacağıq. Buna qədər cari mövsüm süni ot örtüyündə meydana çıxmamışıq. Çalışacağıq ilk növbədə Yevlax səfərində qələbə qazanaq. Komandamızın qarşısında öhdəliklər var. Onları yerinə yetirmək üçün əlimizdən gələni edəcəyik.
- Minsk "Dinamo"su ilə oyunda hesab 2:0 olarkən bir qurtarış etdiniz və zədələndiniz. Az sonra isə bir qədər uğursuz qol buraxdınız. Düşünmürsünüz ki, ilk epizodda əvəzlənsəydiniz, həm sizin üçün, həm də "Neftçi" üçün daha yaxşı olardı?
- Karyeramda çox zədələr olub. Müəyyən zamandan sonra insan ağrılarla oynamağa alışır. Mən də həmin anda zədəni hiss elədim, amma fikirləşirdim ki, komandama meydanda yardımçı olum. Belə hallar tez-tez olur. 2 il əvvəl "Kəpəz"lə oyunda öz müdafiəçimiz Mark Tamaşla oyunda toqquşmuşdum. Ondan sonra 1 ay yaşıl meydandan uzaq qaldım. Elə xarakterim var ki, ağrılara öyrəncəliyəm. İstədim meydanda olum. Fasilədə gördüm ki, ağrılarım artır və buna görə də əvəzləndim.
- Həmin vaxt Kenan Piriçin menecerinin şərhi geniş müzakirələrə səbəb oldu...
- Onunla bağlı "Neftçi"nin mətbuat xidməti lazımi açıqlamanı vermişdi. Artıq şərhə ehtiyac duymuram. Həm də artıq Piriçin də, menecerinin də "Neftçi" ilə əlaqəsi yoxdur. Onlara da gələcək karyeralarında uğurlar arzulayıram.
Bahar Rüstəm