Azərbaycan Premyer Liqasının IV turunda keçirilən “Neftçi” – “Şəfa” (4:1) matçından sonra qonaq komandanın baş məşqçisi Zaur Həşimov mətbuat konfransında jurnalistlərin suallarını cavablandırıb.

Prosport.Az xəbər verir ki, mütəxəssis ilk növbədə ağır məğlubiyyət barədə fikirlərini bildirib.

– Ağır və gərgin oyun oldu. İlk hissədə rəqibə demək olar ki, imkan vermirdik, bütün zonaları bağlamışdıq, lakin sadəcə bir səhvdən “Neftçi” gözəl qol vurdu. 2-ci yarıya yaxşı başlayıb bərabərlik qolunu vursaq da, dərhal ardından iki top buraxdıq. Bu səhvlərdən sonra komanda ruhdan düşdü və sındı. Belə məğlubiyyətlərin də təcrübə baxımından faydalı olacağını düşünürəm.

– Luis Felipenin zədəsi nə yerdədir?

– Zədəsi ciddiyə oxşayır. Sabah tam tibbi müayinədən keçdikdən sonra dəqiq cavab bilinəcək.

– Oyunun qırılma nöqtəsi qapıçının səhvindən sonra buraxılan 2-ci qol oldu. Nicat Mehbalıyevin ardıcıl səhvləri komandada inamsızlıq yaradır. Gələcəkdə onunla bağlı hər hansı tədbir görüləcək?

– Biz Nicatı yenidən qazanmaq və Azərbaycan futboluna qaytarmaq istəyirik, ona görə də üstünə çox getmirik. Ümumiyyətlə, məğlubiyyətdə yalnız Nicatın günahı yoxdur. Bəli, həmin səhvdən sonra komanda çökdü, lakin bu, bizi ruhdan salmamalı, əksinə daha da bərkitməlidir.

– Start heyəti seçərkən hər hansı səhviniz oldu?

– Heyətlə bağlı heç bir peşmanlığım yoxdur. Bugünkü matça kim hazır idisə, onlar da meydanda idi. Umar Diavın start heyətdə yer alması isə rəqibin hücumlarının qarşısını almaq və fiziki mübarizə əzmindən istifadə etmək məqsədi daşıyırdı. Hesab bərabərləşdikdən sonra hücum xəttini gücləndirmək üçün əvəzetmələrə əl atmalı olduq.