Azərbaycan Premyer Liqasının IV turunda keçirilən “Neftçi” – “Şəfa” (4:1) matçından sonra “ağ-qaralar”ın baş məşqçisi Yuri Vernidub mətbuat konfransında jurnalistlərin suallarını cavablandırıb.

Prosport.Az xəbər verir ki, təcrübəli mütəxəssis ilk növbədə qələbəni şərh edib.

– Oyunçularımız özlərini tam şəkildə matça köklədilər. “Şəfa”nın Premyer Liqada yeni olması hər şey demək deyil, onlar nizamlı komandadır. Rüfət Abbasovun möhtəşəm qolu ilə hesabı açdıq. İkinci hissədə standart vəziyyətdən qol buraxsaq da, komandanın reaksiyası xoşuma gəldi. Daha sürətli oynayaraq əlavə 3 qol vurduq. Qələbə qazandığımız və irəlilədiyimiz üçün sevinirəm.

– “Zirə” ilə matçdan sonra start heyətində ciddi dəyişikliklər etmişdiniz. Sanki futbolçuları cəzalandırmışdınız. Həmçinin, Viçko Şevelin debütünü necə qiymətləndirərdiniz?

– Futbolçuları cəzalandırmıram, sadəcə oyunlara uyğun qərarlar verirəm. “Zirə” ilə matçda istədiyimiz oyunu görə bilmədik, hücumda kasad idik. Buna görə də bu dəfə pressinqə üstünlük verdik və oyunçular bunun öhdəsindən gəldilər. Şeveli uzun müddətdir izləyirdik, Şotlandiya çempionatının ən yaxşı mərkəz yarımmüdafiəçilərindən biri seçilmişdi. Heyətimizdə gözəl rəqabət var. Denzel Jubitana kimi yeni oyunçulara da vaxt lazımdır, tələsmirik.

– Rüfət Abbasov matçın təzadlı obrazı idi. Qola qədər sönük olsa da, sonradan açıldı. Onun performansını necə dəyərləndirərdiniz?

– Tamamilə razıyam, bəzən belə olur. Rüfət gənc oyunçudur və Azərbaycan millisinin üzvüdür. Onunla söhbətimiz olub və o, “Neftçi”nin əsas aktivlərindən biridir. Solaxay ola-ola sağ ayaqla möhtəşəm qol vurdu, dirəyə dəyən zərbəsi də oldu.  Rüfət sürəti ilə fərqlənir. Bir oyunda təxminən 1,3 km qaçır və bu, əla göstəricidir.