Azərbaycan Premyer Liqasının IV turu çərçivəsində keçirilən “Qəbələ” – “İmişli” (2:1) matçından sonra qonaq komandanın baş məşqçisi Fərid Namazov mətbuat konfransında jurnalistlərin suallarını cavablandırıb.

Prosport.Az xəbər verir ki, mütəxəssis ilk növbədə məğlubiyyəti şərh edib:

– Rəqibi qələbə münasibətilə təbrik edirəm. Matçın ağır keçəcəyini əvvəlcədən bilirdik. “Qəbələ”də məşqçi dəyişikliyi olmuşdu və adətən belə hallarda futbolçular qeyri-ixtiyari olaraq daha istəkli olur, özlərini doğrultmağa çalışırlar. Gözlədiyimiz kimi, ilk 15 dəqiqə onların təzyiqi altında keçdi və analiz etdiyimiz epizodlardan qapımızda qol gördük. Rəqibin 4-lü müdafiə sisteminə keçəcəyini ehtimal etməmişdik. Daha sonra oyunu bərabərləşdirə bildik. 2-ci hissədə yaxşı oynadığımız vaxtda buraxılan qol bizi çətinə saldı. Buna baxmayaraq, uzaq yoldan gəlib bizi dəstəkləyən azarkeşlərimizə təşəkkür edirəm.

– Rəqibin taktiki dəyişikliyi məğlubiyyətdə əsas rol oynadı, yoxsa digər faktorlar da var idi?

– Bunu səbəblərdən biri hesab edərdim, lakin əsas amil futbolçuların istəyi idi. Məşqçi dəyişikliyi olanda komandada hər zaman əlavə motivasiya yaranır. “Qəbələ” bizdən daha istəkli idi və bu, başa düşüləndir. Topa sahib olmağa çalışdıq, lakin rəqibin sürətli hücumları və uzun ötürmələri komandamıza problem yaratdı.

– İndi sizi ardıcıl olaraq çempionluğa iddialı kollektivlərlə ağır oyunlar gözləyir. Bu qrafik komandaya necə təsir edəcək?

– Bu cür qrafiklə hamı qarşılaşacaq. “Zirə” istisna olmaqla, çempionata nisbətən aşağı səviyyəli rəqiblərlə başlayıb xal ehtiyatı toplamağımız müsbət oldu. İndi qarşıdakı iddialı rəqiblərə qarşı oyun planımız fərqli olacaq. “Qəbələ” və ya “Şamaxı” ilə qarşılaşmalardakı kimi açıq futbol nümayiş etdirməyəcəyik. Daha çox 2-ci nömrədən çıxış edəcəyik, əks-hücumlarda aktiv olmağa çalışacağıq. Favoritlərlə matçlarda mübarizəmizi aparacağıq.